भांगरभूंय | प्रतिनिधी
म्हापशें: पीर्णा चालू आशिल्ले बेकायदो चिऱ्या खणीचेर खण खात्यान धाड घातली. चिरे काडपाक वापरतालीं ती यंत्रसामुग्री जप्त करून पुलिसांनी अज्ञातां आड गुन्यांव नोंद केला.
बार्देस आनी दिवचल म्हालांतल्या शीम वाठारांत पीर्णा बेकायदो चिऱ्यां खण चालू आशिल्ल्याची म्हायती खण खात्याक मेळिल्ली. ते प्रमाण बिरेस्तारा 3 नोव्हेंबराक खण खात्याच्या अधिकाऱ्यांनी दिवचलचे मामलेदार आनी पुलिसां वतीन थंय धाड घातली.
ह्या वेळार पीर्णाच्या सर्वे क्र. 146 जमनीचेर व्हड प्रमाणांत चिरे काडटात अशें दिसून आयलें. थंय व्हड व्हड चिऱ्यां खणी आशिल्ल्यो. तातूंतल्या एका खणींत चिरे काडपा खातीर वापरतात तीं मशिनां आशिल्लीं. तीं खण खात्याच्या अधिकाऱ्यांनी जप्त केलीं.
हे धाडीची सुलूस लागिल्ल्यान घडणूक थळा वयल्यान चिरे काडपी पळून गेल्ले आसपाक जाय, असो दुबाव अधिकाऱ्यांनी उक्तायला. ह्या प्रकरणांत खण खात्याचे सहाय्यक भुगर्भशास्त्रज्ञ नितीन आतोस्कार हांणी पुलिशेंत कागाळ दाखल केल्या. ते प्रमाण पुलिसांन अज्ञातां आड गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
