भांगरभूंय | प्रतिनिधी
फुडल्या दोन दिसांत गडगड मारून पावस पडपाची शक्यताय
पणजी : शेनवारा राज्याच्या कांय वाठारांनी पावस पडले उपरांत आयतारा परतून तापमान वाडलें. आयतारा पणजेचें चडांत चड तापमान 36 अंश जाल्यार मुरगांवचें चडांत चड तापमान 35.5 अंश नोंद जालां. तापमान चड आशिल्ल्या कारणान आयतारा दिसभर गरमी जाताली. येता ते दोन दीस गडगड मारून पावस पडपाचो अदमास हवामान खात्यान उक्तायला.
शेनवारा रातीं वाळपय, धारबांदोडें, पेडणें वाठारांत गडगड मारून पावस पडलो. ह्या पावसाक लागून वीज पुरवण खंडीत जाली. हवामान खात्या कडेन मात ह्या पावसाची नोंद जावंक ना. पावसाच्यो सरी झिरपल्यो इतलीच नोंद आसा. अस्तंत दिकेंतल्यान येवपी वाऱ्याक लागून पावस पडलो अशी म्हायती हवामान खात्याचे वैज्ञानीक राहूल एम हांणी दिल्या. आयज सोमारा काय वाठारांनी पावस पडटलो असो अदमास आसा. चडांत चड तापमान 35 ते 36 अंशा मदीं आसपाचो अदमास आसा.
शेनवारा पावस पडले उपरांत आयतारा दीस भर खर वत आशिल्लें. दमट हवामान नाशिल्लें. गरमी बरीच जाताली. पावस पडलो काय तापमानांत घट जाता. हे खेपे मात तापमानांत घट जावंक ना. उरफाटें तापमान वाडलें. पावस आनी तापमान वाडीक लागून काजी तशेंच आंब्याच्या पिकाक फटको बसपाची शक्यताय आसा.
अंदूं बिगर मोसमी पावसाचें प्रमाण उणें आसा. 1 मार्चा उपरांत सरासरी फक्त 0.9 मिमि पावसाची नोंद जाल्या. ते प्रमाण 5.7 टक्के उणें आसा. जून ते सप्टेंबर मेरेन मोसमी पावस आसता. उपरांत बिगर मोसमी पावस म्हूण नोंद जाता. 1 मार्च सावन गिमाळ्या पावसाची नोंद जाता. 1 मार्च उपरांत पेडण्यां 1.2 मिमि, मडगांव 2 मिमि, केपें 6 मिमि, सांगें 1.2 मिमि पावसाची नोंद जाल्या. शेनवारा वाळपय, पेडणें आनी धारबांदोड्यां पावस पडलो. हवामान खात्या कडेन मात नोंद ना.
शेनवारा गडगड मारतालो तरी ताची व्याप्ती व्हड नाशिल्ली. पावसाचें प्रमाण उणें आशिल्लें. हाका लागून लुकसाणी चड जाली ना. फाटल्या वर्सा तौक्ते वादळाच्या पावसान बरेंच लुकसाण जालें. हेर दिसांनी लेगीत बरोच पावस पडलो. हाका लागून लेगीत बरीच लुकसाणी जाली.
सुवात 24 वरांतलो पावस 1 मार्चा उपरांत पावस
म्हापशें 0 मिमि 0 मिमि
पेडणें 0 मिमि 1.2 मिमि
फोंडें 0 मिमि 0 मिमि
पणजी 0 मिमि 0 मिमि
पोरणें गोंय 0 मिमि 0 मिमि
सांखळी 0 मिमि 0 मिमि
वाळपय 0 मिमि 0 मिमि
काणकोण 0 मिमि 0 मिमि
दाबोळी 0 मिमि 0 मिमि
मडगांव 0 मिमि 2 मिमि
मुरगांव 0 मिमि 0 मिमि
केपें 0 मिमि 6 मिमि
सांगें 0 मिमि 1.2 मिमि
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
