पावसान हुंपलो इंचाचो शेंकडो

भांगरभूंय | प्रतिनिधी

पणजी : फाटल्या तीन दिसांत पावसाचें प्रमाण वाडिल्ल्यान सरासरी पावसान इंचांचो शेंकडो हुंपला. पेडणें, केपें हांगा हाचे पयलींच पावसान इंचांचो शेंकडो पुराय केलां. आतां पावसान सरासरी इंचांचो शेंकडो हुंपला.

आतां मेरेन 2531.4 मिमि पावस जाला. हो पावस बराबर 100 इंच जाता. सरासरी परस 9 टक्के पावस उणो आसा. अंदूं मॉन्सून उसरां पावलो. तरी जूनांत पावसाचो नेट समाधानकारक आशिल्लो. जुलयाचे सुरवेक पावसाचें प्रमाण उणें जालें. 20 जुलय उपरांत परतून नेट वाडलो. 10 ऑगस्टा उपरांत पावसाचो नेट परतून देंवलो. आतां सप्टेंबरांत फाटल्या चार दिसांत पावसाचें प्रमाण वाडलां. चवथी पयली 90 इंच पावस जाल्लो. 24 ऑगस्ट ते 5 सप्टेंबर मेरेन पावसाचें प्रमाण सामकें उणे आशिल्लें. हाका लागून शंबरी गांठपाक कळाव जालो. पावसाचें प्रमाण समाधानकारक आसलें तरी फाटल्या वर्सा परस तें उणें आसा. 7 सप्टेंबरा उपरांत पावसाचें प्रमाण वाडलें आनी इंचांचो शेंकडो पुराय केलो.

पेडणें म्हालांत सगल्यांत चड 3205 मिमि (126 इंच) पावसाची नोंद जाल्या. पेडणें उपरांत सांगें, केपें आनी काणकोण ह्या म्हालांनी चड पावस पडला. सांखळे पावसाचें प्रमाण चड आसता. अंदूं अजून मेरेन सांखळे इंचांचो शेंकडो जावंक ना.

उण्या दाबाचो पट्टो दक्षीण ओडिशा सावन फुडें सरकून दक्षीण छत्तीसगड मेरेन पावला. ताचो प्रभाव आतां उणो जातलो. हाका लागून पावसाचें प्रमाण उणें जातलें. आयज लेगीत येलो अॅलर्ट आसा.

तरेकवार वाठारांतलो पावस (मिमि)

सुवात 24 वरांतलो आतां मेरेनचो

म्हापशें 86 2372.7

पेडणें 89.8 3205

फोंडें 45.8 2572

पणजी 22.2 2214.5

पोरणें गोंय 25.4 2304.1

सांखळी 64.4 2490.8

काणकोण 18.4 2743.2

दाबोळी 11.4 1965.5

मडगांव 2.2 2041.1

मुरगांव 24 2141.4

केपें 12 2813.6

सांगें 12.3 2845.3