भांगरभूंय | प्रतिनिधी
पावसांत भिजून, जिवाची पर्वा करीनासतना झाडां कापतात. फायर ब्रिगेडीचे जवान लोकांची मालमत्ता सांबाळटा. तांकां गोंयचे देवदूत अशें म्हणीन दिस
फाटल्या कांय दिसांनी पावस कोसळटना दिसता. वराचीं वरां पडतूच आसा. गोंयांतूय सगले कडेन उदक जाला. रस्त्यांचेर उदक तुंबलां. पावसा वांगडा वाऱ्यानूय नेट धरला. न्हंयो, व्हाळ भरून उदकाची पातळी चडतूच आसा. दोंगरांचेर झाडां उरूंक नात, देखून वयलें उदक लोकांच्या घरांनी, शेतांनी, दुकानांनी घुसता. मालमत्तेची, जिणेगरजेच्या सामानाचें लुकसाण जाल्लें दिसता. वेळार गटारां उसपूंक नाशिल्ल्यान तीं तुंबल्यांत. जळारां, मुसकांची पैदास जाल्ल्यान डेंग्युची वाड जाल्ली दिसता.
पावसाच्या दिसांनी प्रत्येकान जतनाय घेवपाक जाय. आशिकुशीचीं लातां, कट्ट्यो, टायर काडपाक जाय. नाजाल्यार तातूंत उदक सांठून जळारां तांतयां घालतात आनी डेंग्यू, मलेरिका पातळटा. पंचायतींनी हाचेर लक्ष दिवंक जाय. वादळी वाऱ्याक लागून रस्त्या कुशीचीं व्हडलीं झाडां मुळा सकट हुमटून पडटात. लोकांच्या घरांचें, गाडयांचें लुकसाण जालां. कांय कडेन लोक जखमीय जाल्यात. लायटीच्या खांब्यांचेर, सरयांचेर झाडां, खांदयो पडिल्ल्यान लायट बंद जाता. ती येता म्हणसर चार ते पांच वरां लागतात. झाडां पडिल्ल्यान येरादारी ठप्प जाता. लोकांचे खूब हाल जातात.
उदक तुंबिल्ल्यान गाडयेकारांक रस्त्या वयल्या फोंडकुलांचो अदमास येना. तांकां मनस्ताप सोंसचो पडटा. कांय जाणांक अपघातूय जातात. तेन्ना बांदकाम खात्यान, थळाव्या स्वराज्य संस्थांनी हीं फोंडकुलां पुरोवपाक जाय. पावसाच्या दिसांनी जावं वा हेर केन्नाय सगल्यांच चड कश्ट करचे पडटात, ते लायटीच्या कामगारांक आनी उजो पालोवपी जवानांक. फोन करतकच ते रोखडेच येतात. पावसांत भिजून, जिवाची पर्वा करीनासतना झाडां कापतात. फायर ब्रिगेडीचे जवान लोकांची मालमत्ता सांबाळटा. तांकां गोंयचे देवदूत अशें म्हणीन दिसता.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
