भांगरभूंय | प्रतिनिधी
मुख्यमंत्र्यांची हमीः कोणाच्या उपदेशाची गरज ना
भांगरभूंय I प्रतिनिधी
पणजी : ज्या सरकारी मुळाव्या शाळांनी विद्यार्थ्यांची संख्या उणी आसा, थंयच्या पालकांची तयारी आसल्यार थंय शिक्षकांची नेमणूक करून त्यो शाळा चलोवपाक सरकार तयार आसा, अशें मुख्यमंत्री डॉ. प्रमोद सावंत हांणी बुधवारा स्पश्ट केले.
शाळा चलोवपाक राज्य सरकार तयार आसा. सरकाराक कोणाच्याच उपदेशाची गरज ना, अशें म्हणून तांणी आम आदमी पक्षाचेर (आप) खर टिका केली. सरकारी मुळाव्यो शाळा बंद करतल्यो, अशें आतां मेरेन आपूण केन्नाच म्हणूंक ना. दोन-तीन विद्यार्थी आशिल्ल्यो शाळा लागसारच्या शाळांनी विलीन करून थंय शिक्षकांची संख्या वाडोवप, नव्या शिक्षणीक धोरणा प्रमाण विद्यार्थ्यांक दर्जेदार शिक्षण दिवप, विद्यार्थ्यांक येरादारी वेवस्था करप आनी मुळाव्या शाळांच्या वेवस्थेंत सुदारणा घडोवन हाडपाचे नदरेन सरकारान शाळा विलिनीकरणाचो निर्णय घेतिल्लो. तशेंच शिक्षक, पालकां कडेन मुळाव्या पांवड्यार चर्चा सुरू केल्ली, अशें मुख्यमंत्र्यान म्हणलें.
सरकाराक शाळांच्या इमारतींची न्हय, थंय शिक्षण घेवपी विद्यार्थ्यांचो हुस्को आसा. विद्यार्थ्यांक दर्जेदार शिक्षण दिवन तांची बुन्याद घटमूट करपाचे सरकाराचें ध्येय आसा. ते खातीरूच विवीध पर्यायांची चांचपणी करतात. पूण कांय राजकी पक्षांनी हाचे वयल्यान राजकारण करपाचो यत्न सुरू केला. तांणी सरकाराक उपदेश दिवपाची गरज ना. मुळाव्यो सरकारी शाळा चलोवपाक सरकार समर्थ आसा. फाटल्या 60 वर्सांत सरकारूच शाळा चलयता. 2012 ते 2022 ह्या काळांत राज्यांतले भाजप सरकारान मुळाव्यो शाळा तिगोवन दवरल्यात. तशेंच जंय गरज आसा थंय साधनसुविधा उपलब्ध केल्यात, अशें मुख्यमंत्री डॉ. सावंत हांणी म्हणलें.
दत्तक दिवपाची मागणी करपी आपाचेर खर टिका
ज्या मुळाव्या सरकारी शाळांनी चड विद्यार्थी आसात, त्या शाळा बंद करपा विशीं सरकारान कसल्योच हालचाली सुरू करूंक नात. तरी लेगीत विरोधक सरकाराचेर कारण नासतना आरोप करतात. तशेंच मुळाव्यो शाळा दत्तक दिवपाची मागणी करपी आपाचेर मुख्यमंत्र्यान खर टिका केली. राज्यांतल्या 540 शाळांतल्यान 20 टक्के शाळा सरकार चलयता. हेर सगलीं विद्यालयां, जायत्यो संस्था सरकारी अनुदान घेवन चलयतात. ताका लागून शाळा, विद्यालयां चलोवपाक राजकी पक्षांची गरज ना, तशेंच कोणाच्या उपदेशाची गरज ना, अशेंय मुख्यमंत्र्यान नमूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
