भांगरभूंय | प्रतिनिधी
पणजी : विरोधी पक्ष फुडारी युरी आलेमाव हांणी विधानसभेंत विचारिल्ल्या प्रस्नाक जाप दितना कायदो मंत्री आलेक्स सिक्वेरा हांणी, पर्वरेच्या मुंबय उच्च न्यायालय इमारतीच्या बांदकामा खातीर आतां मेरेन १४४.८९ कोटी रुपया खर्च केले. तांतले १३५.८२ कोटी रुपया कंत्राटदाराक दिले. जाल्यार ७.६१ कोटी सल्लागारां खातीर खर्च केले. तशेंच १.४५ कोटी रुपया हेर कामां खातीर खर्च केले, अशी म्हायती दिली.
१८ ऑक्टोबर २०१४ दिसा गोंय स्थित मुंबय उच्च न्यायालयाचें बांदकाम सुरु केल्लें. तेन्ना बांधकामा खातीर १११.२७ कोटी रुपया खर्चाचो अदमास उक्तायल्लो. जाल्यार बांदकामाच्या करारांतले तेन्नाचे वर्क ऑर्डरी प्रमाण, ११७.४८ कोटी रुपया दिल्ले. ते प्रमाण उच्च न्यायालयाच्या इमारतीचें बांदकाम २०१६ दिसां पुराय जावपाचें आशिल्लें.
उच्च न्यायालयाचो २७ मार्च २०२१ दिसा शुभारंभ जालो. मात ताचो पुरायेन ताबो १६ ऑगस्ट २०२१ दिसा दिलो. अशें आसून लेगीत इमारतीचें बांदकाम मात ३१ मार्च २०२२ रोजी दिसा पुराय जालें. ह्याच काळांत १४ नोव्हेंबर २०२१ दिसा जमनी पोंदचे टाकयेंतल्यान उदक ओव्हरफ्लो जाल्ल्यान हायड्रो न्यूमॅटिक पंप उदका पोंदा गेले. ताका लागून नवे पंप बसोवपाक ८८,७२० रुपया नव्यान खर्च केले. तशेंच उजो पालोवपी यंत्रणेचे पंप आनी हेर दुरुस्ती खातीर २.५० लाख रुपया खर्च केल्यात.
तशेंच २०२३ सावन पांखें आनी हेर दुरुस्तीचें काम हातांत घेतलां. हाचे खातीर सुमार ६.०४ कोटी रुपया खर्च उक्तायला. जाल्यार ह्या कामांत आतां मेरेन १.८९ कोटी रुपया खर्च जाल्यात. हें काम ३० सप्टेंबर २०२४ मेेरेन पुराय जावपाची म्हायती लेखी जापेंत दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
