भांगरभूंय | प्रतिनिधी
म्हापशेंः पर्वरींतल्या कामाक्षी उड्डापनोव (30) हे तरणाटेच्या खून प्रकरणांतलो दुबावीत आरोपी फकीर उर्फ प्रकाश चुंचवाड (22, सुकूर) आनी निरूपडी शंकराप्पा कडकात (21, सुकूर) हांचे अाड पर्वरी पुलिसांनी 600 पानांचें आरोपत्र म्हापशें न्यायालयांत सादर केलें. हातूंत 51 जाणांच्यो साक्ष नोंदयल्यात.
ही खूनाची घडणूक 30 सप्टेंबर 2023 दिसा घडिल्ली. जाल्यार 31 वेर पर्वरी पुलिसांनी दुबावीत आरोपी तशेंच कामाक्षीचो आदलो मोगी बेपत्ता फकीर उर्फ प्रकाश चुंचवाड हाका अटक केल्ली. बेपत्ता आशिल्ल्या कामाक्षीच्या चवकशे खातीर दुबावीत फकीराक पुलिसांनी ताब्यांत घेतलो तेन्ना ताणें खुनाची कबुली दिली. ते उपरांत 1 ऑक्टोबराक पुलिसांनी दुबावीत अारोपी निरुपडी कडकात हाका अटक केल्ली. दोगांय दुबावितांक घेवन पुलिसांनी अांबोली (महाराष्ट्र) घांटांत उडयिल्ली कामाक्षीची कूड सोदून काडिल्ली.
मजगतीं, दुबावीत अारोपी निरुपडी कडकात हाची जामिनाचेर सुटका जाल्या. जाल्यार दुबावीत फकीर उर्फ प्रकाश चुंचवाड हो न्यायालयीन कोठडेंत आसा. पर्वरी पुलीस स्टेशनाचे तेन्नाचे पुलीस निरिक्षक अनंत गांवकार आनी सध्याचे निरिक्षक राहुल परब हांणी ह्या प्रकरणाचो तपास करून आतां न्यायालयांत आरोपपत्र दाखल केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
