भांगरभूंय | प्रतिनिधी
संकल्प आमोणकारः बशींत चडपाक टॅक्सीकारांनी केल्ली मनाय
भांगरभूंय । प्रतिनिधी
मुरगांवः मुरगांव बंदरांतल्या हार्बर क्रूज जेटीचेर आंतरराष्ट्रीय पर्यटक बोटींतल्या पर्यटकांक पर्यटक बशींत चडटना थळावे मुरगांवचो राजा टॅक्सी संघटणेन तांकां मनाय केली. ताका लागून पर्यटकांक परतून बोटींत वच्चें पडलें. बस वेवसायीक आनी टॅक्सी संघटणेचे गैरसमजुतीक लागून ही घडणूक घडली. ते उपरांत विदेशी पर्यटकांनी ह्या प्रकरणांत आपल्या दुतावासांत कागाळ केली. हे घडणुके खातीर टॅक्सी संघटणेच्या गैरवर्तना खातीर आपूण माफी मागता, अशें म्हायती मुरगांवचे आमदार संकल्प आमोणकार हांणी पत्रकार परिशदेंत सांगलें. वास्को बायणाच्या मुरगांव भाजपा संपर्क कार्यालयांत ही पत्रकार परिशद घेतिल्ली.
मुरगांव हार्बर क्रूड जेटी वयल्या आंतरराष्ट्रीय पर्यटक बोटींतल्या पर्यटकांक जो त्रास जालो ते विशीं आपूण खंत उक्तावन माफी मागतां. तशेंच हे फुडें हार्बर क्रूड जेटीचेर विदेशी पर्यटकांक कसलोच त्रास जावपाक दिवचों ना, असो भरवसो आमोणकार हांणी दिलो.
विदेशी पर्यटक बोट सांजे बंदरांत दाखल जाल्ल्यान पर्यटकांनी बशींतल्यान गोंय भोंवडेर वचपाचें थारायलें. पर्यटक ऑपरेटरान बशी क्रूज जेटी भायर दवरिल्ल्यान घडये टॅक्सी वेवसायिकांक विदेशी पर्यटक टॅक्सीन वतले अशें दिसलां आसतलें. कारण पर्यटक बशी रितसर नोंदणी करून आपल्यो बशी क्रूड जेटीचेर पार्क करतात. ताका लागून हो गोंदळ जालो आसतलो, असो दुबाव आमोणकार हांणी उक्तायलो. हो प्रकार घडिल्ल्यान गोंयचें नांव आंतरराष्ट्रीय पांवड्याचेर पेड्डेर जावचें न्हय, हे खातीर आपूण जाहीर माफी मागता. तशेंच मुरगांव म्हालाचे पुलीस उपअधिक्षक, पुलीस निरिक्षक आनी हेर सरकारी अधिकाऱ्यांचे हाजिरेंत मुरगांवचो राजा संघटणेक आपोवन ह्या प्रकरणांत योग्य उपाय काडपा खातीर यत्न करतलों. बस ऑपरेटरान टॅक्सी संघटणा तांचे कडल्यान हप्तो मागता, अशें सांगून टॅक्सी संघटणेचें नांव पेड्डेर करपाचें कारस्थान बंद करचें. गोंय पर्यटन थळ आशिल्ल्यान गोंयांत देशी- विदेशी पर्यटकांक खऱ्या अर्थान बऱ्यो सुविधा मेळटात. ज्या दिसा हें प्रकरण घडलें त्या दिसा आपूण गोंयांत नाशिल्ल्यान टॅक्सी संघटणेचो आपले कडेन संपर्क जावंक शकलो ना. पूण आतां ह्या प्रकरणांत सासणाचो उपाय काडचे खातीर यत्न करतले, अशें आमोणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
