भांगरभूंय | प्रतिनिधी
सरन्यायाधीश डी. वाय. चंद्रचूड आसतले मुखेल वक्ते
पणजी : राज्यांतलो दिव्यांगां खातीरचो पयलो पर्पल महोत्सव 6 ते 8 जानेवारी ह्या काळांत माकनीज पॅलेसा सयत पणजेंत तरेकवार वाठारांनी जातलो. देशाचे सरन्यायाधीश डी. वाय. चंद्रचूड हे मुखेल वक्ते म्हूण महोत्सवाक हाजीर आसतले अशें समाज कल्याण मंत्री सुभाष फळदेसाय हांणी सांगलें.
पणजेच्या कला आनी संस्कृती भवनांत जाल्ले पत्रकार परिशदेंत समाज कल्याण खात्याचे मंत्री सुभाष फळदेसाय हांणी महोत्सवाची माहिती दिली. ह्या वेळार समाज कल्याण खात्याचे सचीव तहा हाजीक, संचालक संध्या कामत, दिव्यांगजन आयुक्त गुरूप्रसाद पावसकार, पत्रकार प्रकाश कामत, संगीतकार आनी गायक शंकर महादेवन, अकादमीचे मुखेल कार्यकारी अधिकारी शीव हे मानेस्त हाजीर आशिल्ले.
गोंय मनरिजवण संस्था कार्यालय, माकनीज पॅलेस, आयनॉक्स, संजय स्कूल पर्वरी, डॉ. श्यामाप्रसाद मुखर्जी स्टेडियम बांबोळी, गेरा स्कूल पोरणें गोंय हांगा कार्यावळी जातल्यो. महोत्सवांत 4 हजारां परस चड प्रतिनिधींची नोंदणी जाल्या. दिसनाशिल्ल्या आनी आयकूंक येनाशिल्ल्या लोकां खातीर संमेलन तशेंच मिस्टर अॅण्ड मीस डॅफ इंडिया सर्त महोत्सवात जातली. दिव्यांगां खातीरची उपकरणां तशेंच साधनांचें प्रदर्शन भरतलें. करमळी, मिरामार हांगा मनरिजवणेच्यो कार्यावळी जातल्यो. कार रॅली, बर्ड वॉक, पणजी दर्शन, चित्रपटांचें प्रदर्शन, क्रुज रायड ह्यो कार्यावळी जातल्यो.
महोत्सवाची रचणूक तरेकवार वाठारांचो विचार करून केल्या. दिव्यांगाचे 21 प्रकार आसात. सगले तरेच्या दिव्यांगां खातीर महोत्सवांत कार्यावळी आसा, अशें समाज कल्याण खात्याचे सचीव तहा हाजीक हांणी सांगलें.
महोत्सवाचें उक्तावण 6 तारखेक जावपाचें आसलें तरी 4 जानेवारी सावन कार्यावळींक सुरवात जातली. 4 ते 6 जानेवारी मेरेन दृश्टीहीन आनी आयकूंक येना तांचे खातीर संमेलन जातलें. 8 जानेवारीक पोरणें गोंय हांगा गेरा स्कुलांत मिस्टर अॅण्ड मीस डॅफ इंडिया 2023 सर्त जातली. पर्पल महोत्सवांत संगीतकार शंकर महादेवन हांचे सयत 60 निवडक विद्यार्थी कला सादर करतले. 5 ते 7 जानेवारी मेरेन पणजी जिमखाना आनी धारबांदोडें मैदानार द्रश्टीहिना खातीर क्रिकेट मॅची जातल्यो. ते भायर कांपाल मैदानार पॅरा टेबल टॅनीस सर्त जातली. अंतर्चक्षू, जागृती मेळावो, इन्क्लुझीव कार्नावाल ह्यो कार्यावळी गोंय वैजकी म्हाविद्यालय इमारत आनी मनरिजवण संस्थेच्या कोर्ट यार्डांत जातल्यो.
———————
200 इमारतींनी जातली दिव्यांगां खातीर सोय
येता त्या दोन वर्सांत 200 इमारतींनी दिव्यांगां खातीर खासा सोय करपाचे उद्दिश्ट आसा. हाचे उपरांत हेर इमारतींनी दिव्यांगां खातीर सोय जातली. गोंयांत 32 हजार दिव्यांग आशिल्ल्याची नोंद आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
