भांगरभूंय | प्रतिनिधी
अखेरेक अर्जेंटिनान फिफाची संवसारीक फुटबाॅल करंड उखल्लो. ते खातीर तांकां दीर्घ काळ वाट पळोवची पडली. थोडीं न्हय, तर 36 वर्सां. हाचे पयलीं 22 जून 1986 दिसा डिएगो मॅराडोनाच्या फुडारपणा खाला तांणी जर्मनीक 3- 2 गोलांनी हारोवन वर्ल्ड कप जिखिल्लो. लोक आजून याद काडटात तो ‘हॅण्ड आॅफ गाॅड’ नांवान गाजिल्लो गोल ह्याच वर्साचे सर्तींत जाल्लो. इंग्लंडा आडचे सेमी फायनलींत! मॅराडोना उपरांत फाटीं पडलो. पूण तो मेरेन लिओनेल मॅसी उदेंल्लो. संवसारांतल्यो मुखेल सर्ती गाजोवपी ह्या खेळगड्यान अर्जेंटिनाक वर्ल्ड कप जिखून दिवपाचें सपन पळयिल्लें. अखेरेक एकदाचें तें ताचे निमणे सर्तींत साकार जालें. कारण हालींच ताणें हें आपलें निमणें वर्ल्ड कप आसतलें, अशें जाहीर केल्लें. निवृत्तीची घोशणाय केल्ली. पूण ताचो निर्णय बदलूं शकता. अर्जेंटिनाक परबीं. ब्राझिलाचो हो शेजारी. दोनूय देशांनी आतां मेरेन एका परस एक म्हान फुटबाॅल खेळगडे दिल्यात.
फिफाचे हे वर्ल्ड कप सर्तींत संवसारांतले आघाडेचे 32 पंगड खेळटात. अंदूंचे सर्तींत अपेक्षा नाशिल्ल्या पंगडांनी बरी कामगिरी करून फुटबाॅल मोगींक धपकेय दिल्ले. सावदी अरेबियान अर्जेंटिनाक, जपानान जर्मनीक, आॅस्ट्रेलियेन डेन्मार्काक, मोरोक्को आनी द. कोरियेन पुर्तुगालाक हार घाल्ली. तोखणाय करपाक जाय ती मोरोक्कोची. घाना उपरांत वर्ल्ड कपाच्या निमण्या फेरयांनी पावपी तो दुसरोच आफ्रिकन देश. तो फायनलीक पावतलो, अशें दिसतालें. पूण खेळांत कांय सांगपाक येना. तेवटेन फ्रान्साक फाटोफाट दुसरे खेपे जिखपाची संद आशिल्ली. पेनल्टीन अर्जेंटिनाक कौल दिलो आनी तांचें सपन भंगलें. तरीय तांच्या किलीयान एम्बापे ह्या 23 वर्सांच्या खेळगड्यान सगल्यांची मनां जिखलीं. दोन गोलांनी फाटीं आसतना ताणें दोन गोल मारून फ्रान्साक कप जिखपाची आस दाखयिल्ली. अंदूंचो गोल्डन बूट पुरस्कार ताकाच मेळ्ळो. गोल्डन बाॅल मेस्सीक, तर गोलकीचें इनाम अर्जेंटिनाच्या एमिलियानो मार्टिनेझ हाका दिलें. हे सर्तींत खेळपाचें सपन दरेक देश पळयता. ते खातीर पात्रताय फेरयोय आसतात. फिफा वर्ल्ड कप सर्त खेळप म्हणल्यार आॅलिंपिक खेळिल्ले सारकें. खेळगड्यां खातीर व्हडलो मान, भोवमान तो. अर्थांत पयशेय भरपूर मेळटात. अंदूं सर्त जिखिल्ल्या अर्जेंटिना पंगडाक 344 कोटी रुपया (भारतीय चलनांत) मेळ्ळे. चार कोटी 20 हजार डाॅलर. फ्रान्साक 248 कोटी. क्रोएशियाक 223 कोटी, मोरोक्कोक 206 कोटी मेळटले. हातूंतलो चडसो पयसो खेळगड्यांक मेळटलो. बाकीचो देशाचे फुटबाॅल संघटनेक.
आमचो देश फिफा क्रमवारींत खूब फाटीं आसलो तरी यत्न केल्यार तो वयर पावपाक शकता. भारत सर्तींत नासलो तरी आयोजक कटार आनी फिफान भारतीय अभिनेत्री दीपिका पडुकोणाक ट्राॅफीचें अनावरण करपाचो भोवमान दिलो. ही संद मेळिल्ली ती पयली भारतीय. शाहरुख खानाकूय एका टीव्ही चॅनलान फायनल मॅचींत वेन रुनी वांगडा लायव्ह संवाद करपाची संद दिली. आमच्या देशांत आयएसएल सर्त जाता. तातूंत कांय विदेशी खेळगडेय खेळटात. मात ते एकतर निवृत्त जाल्ले आसतात वा पिरायेची तिशी हुपिल्ले. 20 वर्सां पिराये सकयले नवोदीत खेळगडे आयएसएलांत खेळोवप शक्य ना? तशें केल्यार भारतीय फुटबाॅल मुखार सरपाक मजत जातली. हालींच 17 वर्सां सकयल्या पिरायेच्या चलयांचो वर्ल्ड कप भारतांत जालो. चलयांची आयपीएल खेळयतात, तशी आयएसएल सर्त खेळोवप शक्य ना? आमचें सुपुल्लें गोंय फुटबाॅलांत देश पांवड्याचेर आघाडेचेर आसा. आमचे खेळगडे आंतरराष्ट्रीय पांवड्याचेर पावतले हे खातीर यत्न जाल्यार बरे. क्रिकेट वर्ल्ड कप जिखतकच भारतांत क्रिकेट क्रांती जाली. आतां ती फुटबाॅलांतूय जावची. आशियेंत तरी आमी नंबर वन जावपा खातीर कश्ट करचे.
ब्राझील, पुर्तुगाल, अर्जंटिना सारक्या देशांनी हालींच्या वर्सांनी म्हान खेळगडे तयार केल्यात. ख्रिस्तियानो रोनाल्डो सगल्यांत चड 819 गोल करून मुखार आसा. आफ्रिकी देशूय आतां मुखार सरपाक लागल्यात. मेहनत घेतल्यार सगलें शक्य जाता, हेंच अंदूंच्या वर्ल्ड कपान दाखोवन दिलां. तेन्ना भारतीय खेळगड्यांनी हें मनार घेवपाक जाय. आमी फाटल्यान कित्याक उरतात, ताचेर खरें म्हणल्यार
भासाभास जावप आनी समस्यांचेर उपाय सोदप गरजेचें. आफ्रिकेंतले आमचे परस गरीब आशिल्ले देश पसून वर्ल्ड कप फुटबाॅल खेळपाक लागले, मागीर आमीच कित्याक फाटल्यान उरतात?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
