भांगरभूंय | प्रतिनिधी
हिंदी सिनेमाचो पयलो सुपरस्टार म्हणून वळखतात, त्या म्हान अभिनेतो राजेश खन्ना हांची आयज णववी पुण्यतिथी. ते निमतान विशेश.
राजेश खन्नाचो जल्म 29 डिसेंबर 1942 ह्या दिसा पंजाबांतल्या अमृतसरांत जालो. तांचें मूळ नांव जतीन खन्ना. ताचो बापूय शाळेचो मुख्याध्यापक आशिल्लो. ताच्या भावाक भुरगीं नाशिल्ल्यान राजेशाक ताका पोसको दिल्लो. काका चुनीलाल खन्ना हो रेल्वे कंत्राटदार आशिल्लो. तो मुंबय रावतालो. सेंट सेबास्टियन गोन हायस्कुलांत शिकतना राजेश खन्नाची रवी कपूरा कडेन वळख जाली. रवी कपूर उर्फ जितेंद्र हो उपरांत नामनेचो अभिनेतो जालो. राजेश आनी जितेंद्र हांणी कॉलेजींत जायत्या नाटकांनी एकठांय काम केलें. उपरांत उच्च शिक्षण घेवपाक राजेश खन्ना पुण्याक आयलो. दोन वर्सां शिक्षण घेतले उपरांत तो परत मुंबय आयलो.
मुंबयंत कांय दिग्दर्शकांनी एक टॅलेंट हंट सर्त आयोजीत केल्ली. राजेश खन्नाच्या काकान हे सर्ती खातीर ताचें नांव नोंद केलें. पूण नोंदणी करतना जतीन खन्ना बदला राजेश खन्ना अशें नोंद केलें आनी फुडें ह्या नांवान राजेश खन्नाक वळखूंक लागलें. हे सर्तींत ताका पयलें इनाम मेळ्ळें.
1966 वर्सा चेतन आनंदान ताका ‘आखरी खत’ ह्या चित्रपटांत संद दिली, जो ताचो पयलो चित्रपट. तो ऑस्करांत गेलो. पयल्याच सिनेमांत ताणें केल्ल्या अभिनयान चित्रपट मोगीं खूब प्रभावित जाले. तेन्नाच्या अभिनेत्यां परस राजेश खन्नाचो अभिनय वेगळोच आशिल्लो. उपरांत त्या काळांतलो एक यशस्वी दिग्दर्शक शक्ति सामंत हाणें ताका आराधना ह्या सिनेमांत मुखेल भुमिका दिली. ह्या सिनेमांत शर्मिला टागोर तिची नायिका आशिल्ली. तो सुपर हिट जालो. सगळीं गितां लोकप्रिय जालीं. ह्या फिल्मा उपरांतच राजेश खन्ना सुपरस्टार म्हणून वळखूंक लागले.
राजेश खन्नाच्या अभिनयान आनी संवादाचे शैलीन तरणाट्यांक पिशें जालें. खास करून कॉलेजींतल्यो चलयो सामक्योच पिश्यो जाल्लो. ताचे फॅन्स ताचे गाडयेचें चुंबन घेताले. चलयो गाडयेची धुल्ल डब्यांत भरून घरा व्हरतालीं. जायत्या चलयांनी तांच्या फोटवा कडेन लग्नूय केल्लें. असो मोग उपरांत एकाय अभिनेत्याक मेळूंक ना.
राजेश खन्नाचे सलग 17 चित्रपट सुपरहिट जाले. हो एक विक्रम. शर्मिला टागोर, मुमताज, आशा पारेख, तनुजा हांचे वांगडा ताची बरी केमिस्ट्री आशिल्ली. सत्तरच्या दशकांत राजेश खन्ना सुपरस्टार पदाचेर पावलो. चलपाची आनी उलोवपाची खाशेली शैली, मान झटको मारून नाचपाची खाशेली शैली, हावभाव, पेजाद संवाद आनी ओंठार खेळपी गितां राजेश खन्नाक खंयचे खंय घेवन गेलीं. त्या वेळार सगळ्यांत चड कमाई करपी राजेश खन्ना हांणी 1973 वर्सा ताचे परस खूब ल्हान आशिल्ल्या डिंपल कपाडिया कडेन लग्न केलें. 1992 वर्सा काँग्रेसी वतीन ताणें दिल्ली मतदारसंघांतल्यान लोकसभेची पोटवेंचणूक लढयली आनी खासदार म्हूण वेंचून आयलो. 18 जुलय 2012 दिसा राजेश खन्नाक मरण आयलें.
“बाबू मोशाय……. बाबू मोशाय, जिंदगी और मौत उपरवाले के हाथ में है जहांपन्ना…जिसे ना तो आप बदल सकते है ना मै….” आनंद कभी मरते नही वह हमेशा याद रहते है…. तूं अजून आमचे यादींत आसा. ताचे यादीक नमळायेचीं आर्गां.
– श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
