भांगरभूंय | प्रतिनिधी
‘बिहायंड दि बायलायन’ कार्यावळींत संदेश प्रभुदेसाय हांचें मत
पणजी: सद्याच्या काळांत पत्रकारांनी फक्त एखादे घडणुकेचें वृत्तांकन करिनासतना सोद पत्रकारिता करची. नव्या पत्रकारांनी म्हायती अधिकाराचो वापर करचो. आपणे केल्ल्या बातम्यांचो फॉलोअप करून त्यो लावन धरप गरजेचें आसा. पत्रकारिता ही सत्याचे वटेन पक्षपाती असल्यार हरकत ना अशें मत ज्येश्ठ पत्रकार संदेश प्रभुदेसाय हांणी उक्तायलें.
गोवा श्रमीक पत्रकार संघटणे वतीन ‘बिहायंड दि बायलायन’ कार्यावळींत ते उलयताले.
तांणी मुखार म्हणलें, हांवें पत्रकारितेची सुरवात रोमी कोंकणींतल्यान केली. उपरांत वेगळ्या वेगळ्या दिसाळ्यांनी, टिव्ही चॅनलांनी काम केलें. मदेकांत कांय वेळ मुक्त पत्रकार म्हूण काम केलें. गोंयांतली पयली डिजिटल न्यूज सर्व्हीस सुरू केली. पिरायेच्या 35 व्या वर्सा संपादक जावपाची संद आयिल्ली, पूण ताका हांवें न्हयकार दिलो. ह्या प्रवासांत कठीण प्रसंग आयलें. पूण कुटुंबान म्हाका सदांच तेंको दिलो. तांणी म्हाका खंयचेच परिस्थितींत तत्व सोडचें न्हय असो सल्लो दिलो अशें प्रभुदेसाय हांणी सांगलें.
तांणी मुखार उलयतना म्हणलें, लोकशायेंत चार खोबे आसात अशें समजतात. म्हज्या मतान लोकशायेचे पांच खांबे आसात. हे रचणुकेंत एक मोटो खांबो आनी ताचे वटेन हेर खांबे आसात. मदलो खांबो हो निती मुल्यांचो, शिक्षणाचो, निसुवार्थीपणान काम करपी फुडाऱ्यांचाे आसा अशें म्हाका दिसता. ह्या मदल्या खांब्यांतल्यान बरें काम करपाची प्रेरणा मेळत आसता. समाजाचो मुलभूत ढाचो ह्या खांब्यार निंबून आसा. पूण सध्या हो खांबो हाल्ला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
