भांगरभूंय | प्रतिनिधी
अश्टमी फेरी, चवथीचो बाजार हाका लागून वाडलो कोयर
पणजी: फाटल्या 15 दिसांत शारांत कोयराचें प्रमाण आनीक वाडलां. अश्टमीची फेरी तशेंच चवथीचो बाजार जाले उपरांत कोयर आनीक वाडलो. दर दिसा दोन ते तीन ट्रक कोयर फाटल्या 15 दिसांत पणजी म्हापालिकेक चड एकठांय करचो पडलो अशी म्हायती पणजी म्हापालिकेचे उपम्हापौर संजीव नायक हांणी दिली.
पणजी शारांत दिसाक अदमाशेक 15 ट्रक कोयर जायत आसता. हातूंत आनीक दोन ते तीन ट्रक चड जातालो. अशें आसून लेगीत पणजी म्हापालिकेच्या कर्मचाऱ्यांनी शारांतलो सगलो कोयर एकठांय केला. तशेंच गणपती विसर्जना वेळार एकठांय जाल्लो कोयर पणजी म्हापालिकेच्या कर्मचाऱ्यांनी एकठांय केला. सगल्या कोयराचो विलो लायला अशी म्हायती संजीव नायक हांणी दिली.
सुको तशेंच ओलो कोयर वेगळो केला. तशेंच प्लास्टिकाचो कोयर लेगीत वेगळो केला. पयली हो कोयर पाट्यार एकठांय केलो उपरांत ताळगांवां कोयरा प्रकल्पांत ताचो विलो लायलो. अश्टमीचे फेरयेक व्हड प्रमाणांत दुकानां भरिल्लीं, हाका लागून कोयर व्हड प्रमाणांत वाडलो. तशेंच चवथीच्या बाजारा निमतान माटोळीचो बाजार तशेंच हेर बाजार साहित्याक लागून कोयर निर्माण जाल्लो. पूण म्हापालिकेन सगल्या कोयराचो वेवस्थीत विलो लायलो अशें उपम्हापौर संजीव नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
