भांगरभूंय | प्रतिनिधी
गरजेचें सहकार्य करचें, राज्यांतल्या शेतकारांची मागणी
भांगरभूंय । गायत्री हळर्णकार
पणजी : सरकारान राज्यांतल्यो पडीक जमिनी आपल्या ताब्यांत घेवन त्यो शेती करपाक इत्सूक आसपी तरणाट्यांच्या ताब्यांत दिवच्यो. शेती करपाक तांकां गरजेचें सहकार्य करचें आनी कंत्राटी शेतीक उर्बा दिल्यार मुख्यमंत्री डॉ. प्रमोद सावंत हांच्या सपनांतले ‘स्वयंपूर्ण गोंय’ निश्चीत प्रत्यक्षांत देंवपाक शकता, अशी प्रतिक्रिया राज्यभरांतल्या शेतकारांनी उक्तायल्या.
जमनी पडीक दवरप हो व्हड गुन्यांव. अशो जमनी सरकार आपल्या ताब्यांत घेवपाक शकता. ते विशीं कायदोय जावपाक शकता. ताका लागून शेतकारांनी जमनी पडीक दवरिनासतना त्यो लागवडी खाला हाडच्यो, अशी शिटकावणी उदका स्रोत मंत्री सुभाष शिरोडकार हांणी चार दिसां पयलीं दिल्ली. हाचे वयल्यान राज्यांत खवदळ पडिल्लो. हे फाटभुंयेर कांय शेतकारांच्यो प्रतिक्रिया आमच्या प्रतिनिधीन जाणून घेतल्यो.
पडीक जमनी ताब्यांत घेवन सरकारान त्यो शेतीची आवड आशिल्ल्या तरणाट्या शेतकारांच्या ताब्यांत दिवच्यो, अशें जायत्या जाणांनी सांगलें. कृषी क्षेत्रांत राज्याक स्वयंपूर्ण करतना पयलीं राज्याचें कृशी धोरण सुरळीत करपाची गरज आसा.
सरकार पडीक जमनी ताब्यांत घेवन त्यो उत्पादन घेवपाक हेरांक दिवपाच्या विचारांत आसत जाल्यार संबंदींत शेतकारांक गरजेच्यो सगल्यो सुविधा, अनुदान, मशिनरी दिवप गरजेचें. अशो जमनी तरणाट्यांच्या ताब्यांत दिल्यार राज्यांतली बेरोजगारी उणी जावपाक मजत जातली, अशें मत प्रसाद वेळीप हांणी उक्तायलें.
शेतकारांक ‘स्वयंपूर्ण’ करप गरजेचें
सरकारान शेतकार हो केंद्रबिंदू दवरून ‘स्वयंपूर्ण गोंय’ मोहिमे खाला कृशी क्षेत्राची उदरगत करपाक जाय. सरकाराच्यो कांय येवजण्योे सामान्य शेतकारां मेरेन पावनात. हे चित्र बदलपाची गरज आसा. फाटल्या कांय वर्सां पसून तरणाटे शेती वेवसाय करपाक लागल्यात. अशा तरणाट्यांक चडांत चड सहकार्य मेळपाक जाय. तांचे खातीर कंत्राटी शेतीक प्राधान्य दिवप म्हत्वाचें, अशें राज्य सरकाराचो कृशी विभूशण पुरस्कार फावो जाल्ले शेतकार उदय प्रभुदेसाय हांणी म्हणलें.
पोक्यो घोशणा नाकातः सरदेसाय
केंद्र सरकाराच्या जमीन संपादन कायद्याक लागून राज्य सरकार पडीक जमनी आपल्या ताब्यांत घेवपाक शकना. ताका लागून मंत्र्यांनी पोकीं आस्वासनां वा घोशणा करच्यो न्हय. कृशी मंत्री आसतना आपूण पडीक जमनी वापरात येवच्यो, हे खातीर यत्न केल्ले. कंत्राटी आनी भौशीक शेतीक प्राधान्य दिवपाक कायदे हाडिल्ले. पूण ते उपरांत सावंत सरकारान हाचे कडेन आडनदर केली, अशें आदले कृशी मंत्री तशेंच सध्याचे आमदार विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
