पगार मेळूंक नाशिल्ल्यान भारतीयांनी ओमानांतल्यान बोटींतल्यान काडलो पळ

भांगरभूंय | प्रतिनिधी

मस्कत, खबरां संस्था ः पगार दिवंक नाशिल्ल्यान ओमानांत काम करपी तीन भारतीय भारतांत पळून आयलें. देशांत परत येवपा खातीर तांणी दर्याचो मार्ग निवडलो आनी ते खातीर तांणी बोट चोरली. तांणी बोटीन ३००० किमी प्रवास केलो. पूण 6 दिसांनी कर्नाटकांतल्या उडुपी दर्यादेगे लागीं भारतीय दर्यादेग सुरक्षा पुलिसांनी तांकां धरले. सोमारा तांकां उडुपी हांगाच्या न्यायालयांत हजर करून न्यायालयीन कोठडीठ दिल्या.
ओमानी कंपनीन तांचे पासपोर्ट जप्त केल्ल्यान ते बोटींतल्यान पळून गेले. जेम्स फ्रँकलिन मोझेस (50), रॉबिन्स्टन (50) आनी डेरोस अल्फोन्सो (38) हे तमिळनाडूचे आसात. ते तिगूय ओमानांतल्या नुस्तेमारी कंपनींत काम करताले. थंय तांकां वेळार पगार मेळनाशिल्लो आनी तांकां त्रास करताले. अशें परिस्थितींत तिगांयनी घरा परतपाचें थारायलें. पूण, ओमानी कंपनीन तांचे पासपोर्ट जप्त केल्लें. देखून तांकां दर्यामार्गा बगर घरा परतपाक दुसरो मार्ग नाशिल्लो. तिगूय नुस्तेंमारी बोटींतल्यान पळून गेले.
17 फेब्रुवारीक दनपारां 3 वरांचेर उदेंत ओमानांतल्या दुक्म बंदरा वयल्यान हे तिगूय भायर सरले. 6 दिसांचो प्रवास करून 23 फेब्रुवारीक उडुपींतल्या सेंट मेरी जुंव्या लागसार बोटींतल्यान भारतीय शिमेत प्रवेश केलो. थळाव्या नुस्तेकारान ओमानाची बोट पळोवन दर्यादेग सुरक्षा पुलिसांक म्हायती दिली. उपरांत भारतीय दर्यादेग सुरक्षा पुलिसांनी दनपारां 4:30 वरांचेर सेंट मेरी जुंव्या लागसार तिगांकूय अटक केली.
मजगतीं, चवकशे वेळार हे लोक फकत जीपीएस उपकरणाच्या मजतीन सुमार 3 हजार किलोमीटर दर्या मार्गान प्रवास करुन कारवार दर्यादेगे सावन सेंट मेरी जुंव्या मेरेन पाविल्ल्याचें कळ्ळें.