भांगरभूंय | प्रतिनिधी
621 उमेदवारां कडल्यान अर्ज फाटीं, 64 जाणांची बिनविरोध निवड
पणजी : 10 ऑगस्टाक जावपी 186 पंचायतींच्या वेंचणूक रिंगणांत 5,038 उमेदवार आसात. बुधवारा अर्ज फाटीं घेवपाच्या दिसा वट्ट 621 उमेदवारांनी अर्ज फाटीं घेतले. 64 जाणांची बिनविरोध पंच म्हूण निवड जाल्या.
गोंयांतल्या कार्यकाळ सोंपिल्ल्या 186 पंचायतींच्या वेंचणुकां खातीर 10 ऑगस्टाक मतदान जातलें, 12 ऑगस्टाक मतमेजणी. 18 ते 25 जुलय ह्या काळांत अर्ज भरपाक परवानगी आशिल्ली. ह्या काळांत राज्य वेंचणूक आयोगा कडेन वट्ट 6,256 अर्ज आयिल्ले. मंगळारा छाननी उपरांत 14 अर्ज बाद थारले. जाल्यार निमाणे छाननी उपरांत 5,273 अर्ज वैद्य थारले. बुधवारा अर्ज फाटीं घेवपाच्या दिसा 621 उमेदवारांनी अर्ज फाटीं घेतल्यात. तशेंच 64 जाणांची बिनविरोध निवड जाल्या.
ह्या सगल्या प्रक्रिये उपरांत आतां प्रत्यक्ष वेंचणूके रिंगणांत वट्ट 5,038 उमेदवार आसात.
तीन दीस सोऱ्याचीं दुकानां बंद
पंचायत वेंचणुकांचे फाटभुंयेर 9, 10 आनी 12 ऑगस्ट दिसा राज्यभरांतलीं सोऱ्याचीं दुकानां बंद दवरतले, अशी अधिसुचोवणी वित्त खात्याचे सचीव प्रणब भट हांणी बुधवारा जारी केल्या. जांची बार अॅण्ड रेस्टॉरंट आसात तांकां ह्या तीन दिसांनी जेवणा खातीर रेस्टॉरंट सुरू दवरपाक मेळटले. पूण सोऱ्याचीं विक्री करपाक मेळची ना, अशेंय अधिसुचोवणेंत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
