भांगरभूंय | प्रतिनिधी
काणकोण: पंचायत वेंचणुकेचे फाटभुंयेर सुरक्षा वाडोवपाचे नदरेन आनी विवीध गजालींचेर चर्चा करपा खातीर दक्षीण गोंयचे शिमे वयल्या काणकोण आनी कर्नाटकच्या कारवार पुलिसांची जोड बसका हालींच काणकोण पुलीस स्टेशनार जाली.
हे बसकेंत विवीध प्रकारच्या गुन्यांवाचेर चर्चा करतना येता ती पंचायत वेंचणून सुरळीतपणान पार पाडपाचे नदरेन शिमे वयल्या पुलिसां कडल्यान सहकार्याची अपेक्षा आसा ते हे बसकेंत स्पश्ट केलें. तशेंच गुन्यांवां कडेन संबंदीत व्यक्तींची एक वळेरी तयार करप, पुलीस स्टेशनार नोंद जाल्ल्या बेपत्ता व्यक्तींची वळेरी तयार करप, वेंचणूक वेळार कसलीय वायट घडणूक घडल्यार दोनूय पुलीस स्टेशनांनी जोडपणान तें प्रकरण सोडोवप, तेच बरोबर दोनूय पुलीस स्टेशनां मदीं सलोख्याचे संबंद दवरप अशे म्हत्वपूर्ण निर्णय घेतले.
हे बसकेक पुलीस उपअधिक्षक निलेश राणे, पुलीस निरिक्षक चंद्रकांत गांवस, येरादारी पुलीस निरिक्षक महेश वेळीप, सीआयडीचे उपनिरिक्षक सूर्यकांत सावळ आनी काणकोण पुलीस स्टेशना वयले हेर पुलीस कर्मचारी हाजीर आशिल्ले. तेच बरोबर हे जोड बसकेक कारवारचे पुलीस उपअधिक्षक वॅलेन्टोन डिसोझा, गुन्यांव फांट्याचे निरिक्षक गोविंदराज दसरी, चित्ताकुला पुलीस स्टेशनाचे उपनिरिक्षक विश्वनाथ आनी गुन्यांव फांट्याचे पुलीस कर्मचारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
