भांगरभूंय | प्रतिनिधी
शैलेश झिंगडे ः पंचक्रोशी हायस्कुलांतल्या विद्यार्थ्यांचो भोवमान
भांगरभूंय प्रतिनिधी
हरमल ः कोरोनाचे स्थितींतल्यान शिक्षण संस्था आनी विद्यार्थी सांवरतात. पंचक्रोशी संस्थेन ज्या प्रमाण विद्यार्थ्यांक प्रोत्साहन दिलें ते खातीर तांचें कवतूक. तांणी विद्यार्थ्यां मदीं आत्मविस्वास निर्माण केलो आनी वाडयलो. ताका लागून ही संस्था निश्चितूच माॅडेल संस्था थारतली अशें शिक्षण संचालकल शैलेश झिंगडे हांणी सांगलें.
हरमल पंचक्रोशी हायस्कुलांतल्या धावेचे परिक्षेंतल्या विद्यार्थ्यांचो भोवमान करपाच्या सुवाळ्यांत ते उलयताले.
पंचक्रोशी संस्थेन विद्यार्थ्यांक घडोवपा खातीर दर्जात्मक शिक्षणाची बुन्याद घाली. संस्कारीत शिक्षण दिवपाची आयज गरज आसा. संस्थेन दोळे दिपकावपी वावर केला. चॅरमन लक्ष्मीकांत पार्सेकार हांचे प्रती हांव सदांच कृतज्ञ आसा अशेंय झिंगडे हांणी सांगलें.
संस्थेन निकालाची परंपरा कायम दवरूंक जाय. विद्यार्थ्यांच्या व्यक्तीमत्व विकासाक प्राधान्य दिवंक जाय अशें सांगून चॅरमन लक्ष्मीकांत पार्सेकार हांणी अध्यापकांचें आनी मुख्याध्यापिका स्मिता पार्सेकार हांचें अभिनंदन केलें.
विद्यार्थ्यांक तांचे आवडी प्रमाण संद दिल्यार परिक्षेंत येस निश्चीत मेळटा. विद्यालयाचे संगीत शिक्षक लेगीत विद्यार्थ्यांक प्रोत्साहन दिवपा खातीर वावुरतात अशेंय पार्सेकार हांणी सांगलें.
ह्या वेळार माचयेर हायस्कुलाचे मॅनेजर आनी डीआयईटीचे उपप्राचार्य देविदास कुडव, मुख्याध्यापिका स्मिता पार्सेकार आनी निवृत्त शिक्षिका प्रज्वला सावंत हांची उपस्थिती आसली. मानेस्तांचे हस्तुकीं गुणी विद्यार्थ्यांक स्मरणचिन्नां आनी रोंपां दिलीं.
आदले मुख्यमंत्री तशेंच चॅरमन लक्ष्मीकांत पार्सेकार हांणी पंचक्रोशी संस्थेचे वतीन शिक्षण संचालक शैलेश झिंगडे हांचो शाल, श्रीफळ आनी स्मरणचिन्न दिवन सत्कार केलो.
सुरवातीक शिक्षण संचालक झिंगडे हांचे हस्तुकीं दिवली पेटयली, श्री सरस्वतीच्या फोट्याक हार घालो आनी रोपट्याक उदक घालून उक्तावण केलें. विद्यालयाच्या विद्यार्थ्यांनी येवकार गीत सादर केलें. तांकां दशरथ नायक, मकरंद परब (हार्मोनियम) आनी राजीव गांवकार (तबला) हांणी साथ केली.
शिक्षिका अपर्णा गावडे हांणी येवकार दिलो. शिक्षिका ज्योती वळवयकार हांणी रोपटीं दिलीं. विद्यार्थी गौरवाचीं नांवां प्रसाद शेटगांवकार हांणी वाचलीं. पूजा बांधकर हांणी सुत्रसंचालन केलें आनी पल्लवी साळगांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
