भांगरभूंय | प्रतिनिधी
खबरां संस्था
क्वालालंम्पूरः भारताचो अव्वल स्नुकर खेळगडो पंकज अडवाणीन मलेशियांत जाल्ले संवसारीक बिलियर्ड्स चॅम्पियनशिपींत (आयबीएसएफ) निमणे फेरयेंत भारताच्याच सौरव कोठारीक 4-0 अशें हारोवन आपले कारकिर्दींतलो 25वो संवसारीक करंड जिखलो. आक्रमक खेळ करून ताणे कोठारीक संद दिवचो ना हें पयले फ्रेमी पसून दाखोवन दिलें. 150 परच चड प्रकारांत अडवाणीन 149च्या ब्रेक सयत पयली फ्रेम घेतली. तेन्ना कोठारीन खातेंय उगडलें नाशिल्लें.
सौरवाक ताच्या पयल्या आंतरराष्ट्रीय बिलियर्ड्स आनी स्नूकर महासंघाच्या संवसारीक किताबाची प्रतिक्षा आसा. ह्या बेस्ट ऑफ सेव्हन फायनलींत अडवाणीन सुरवेक सावन बरें प्रदर्शन केलें. एका कॅलेंडर वर्सांत पांचवे फावट बिलियर्ड्स राष्ट्रीय, आशियाई आनी संवसारीक करंड जिखपाचो विक्रम प्रस्थापीत केलो. कोठारीक दुसरे फ्रेमींत संद मेळिल्ली मात ताचो ताका फायदो घेवपाक मेळो ना. दुसरे वटेन अडवाणीन 77व्या ब्रकचे मजतीन 2-0 अशी आघाडी घेतली. ते उपरांत ताचो खेळ बरो जायत गेलो आनी आपले कुशळतायेन मलेशियन प्रेक्षकांचेर मोनेळ घातलो.
अडवाणीन तिसऱे फ्रेमींत सर्तींतलो सगळ्यांत सगळ्यात व्हडलो ब्रेक केलो. ताका लागून किताबा पसून तो फकत एक फ्रेम पयस आशिल्लो. चवथे फ्रेमीत 80 आनी 60 अशे दोन ब्रेक घेयत ताणे करंड जिखलो. कोठरीची कामगिरी सामकी निर्शेणी करपी जाली. ताका फकत 72 गुण मेळ्ळे. दुसरे वटेन अडवाणीन 660 परस चड गुण मेळोवन किताब जिखलो.
कोरोनाक लागून 2019 वर्सा निमणी संवसारीक चॅम्पियशशीप जाल्ली. अडवाणीन 12 म्हयन्यां पयलीं कताराक निमणो संवसारीक करंड जिखल्लो. ते उपरां ताणे आयबीएसएफ 6- रेड स्नूकर संवसारीक कपा सर्त जिखल्ली. ह्या वर्सा दरेका बिलियर्ड्स सर्तींत जे तरेन करंड जिखला ते खातीर हांव खोशी आसा. संवसारीक पांवड्यार देशा खातीर आनीक एक भांगरापदक जिखिल्ल्याचो म्हाका अभिमान आसा अशें पंकज अडवाणीन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
