न्यायाचो बावटो येवपी पिळगे खातीर हुबत रावतलो अशे तरेन काम करचें

भांगरभूंय | प्रतिनिधी

सरन्यायाधीश डी. व्हाय.चंद्रचूड हांचो वकिलांक उलो

राजकोट, खबरां संस्था ः न्यायाचो बावटो येवपी पिळगे खातीर कायम हुबत रावतलो अशे तरेन वकिलानी काम करचें, असो उलो सर्वोच्च न्यायालयाचे सरन्यायाधीश डी.व्हाय.चंद्रचूड हांणी मारलो. गुजरात दौर्‍या मजगतीं ते राजकोट हांगा उलयताले.
दरेका नागरिकाक न्याय हक्काची खात्री दिवपी समाजाची कल्पना करतना, जिल्हो न्यायालयां दरेका नागरिकां खातीर सुरवातेक आधार म्हणून फुडें सरता. नागरीक पयलीं सर्वोच्च न्यायालयांत येना. ते जिल्हो न्यायालयांत येतात. ताका लागून बाराचे वांगडी म्हणून तुमच्या कामांत तुमी आत्मविस्वास निर्माण करतले. न्यायाचो हो बावटो येवपी पिळगे मदीं हुबत रावतलो हाची आपूण खात्री दितां, अशें न्या. चंद्रचूड हांणी म्हणलें.
दोन दिसांचे गुजरात भोंवडेंत तांणी द्वारका आनी सोमनाथ देवळांक भेट दिवन देवाचें दर्शन घेतलें. देवळा वयल्या ध्वजाचो संदर्भ दितना, सरन्यायाधीशांनी म्हणलें, “म्हाका आयज सकाळीं द्वारकाधीशजींच्या ध्‍वजा वयल्यान प्रेरणा मेळ्ळी. हो ध्वज जगन्नाथ पुरीच्या ध्वजाप्रमाण आसा. ह्या ध्वजाक आमचे खातीर एक विशेश अर्थ आसा. तो म्हणल्यार – वकील म्हणून, न्यायाधीश म्हणून, नागरिक म्हणून आमचें मदीं एकीकरण करपी शक्त आसा…. आनी ती एकत्रित करपी शक्त म्हणजे आमचें मनीसपण, जें कायद्याच्या राज्या वरवीं आनी भारतीय राज्यघटने वरवी चालीक लागलां.”