भांगरभूंय | प्रतिनिधी
फाटल्याच सप्तकान गोंय सरकारान दोन दिसांचो मेगा रोजगार मेळावो ताळगांवांच्या डॉ. श्यामप्रसाद मुखर्जी स्टेडियमांत दवरिल्लो. ताका 20 हजार नोंदणीच्या रूपान उपाट प्रतिसाद मेळिल्लो. ह्या मेळाव्याक दहा हजार उमेदवारांनी हाजिरी लयिल्ली. हातूंतल्या 4800 जाणाची नोकरे खातीर निवड जाली तर 500 परस चड उमेदवारांक नेमणूक पत्र हातांत मेळ्ळें. ह्या मेळाव्याक 160 कंपनीं हाजीर आशिल्ल्यो. हातून सरबराय, म्हायती तंत्रज्ञान, फार्मा, एशियन क्रूज लायनर कंपनींचो आस्पाव आशिल्लो. जांकां नोकरी मेळ्ळी तांकां परबीं, पूण जांकां मेळूंक ना, तांणी दोश कंपनींक वो आनी कोणायकूय दिनासतना आपले भितर कितें उणें आसा, हाचो सोद घेवप तितलेंच गरजेचें. ही परिस्थिती हांचीच न्हय तर बऱ्याच बेकार उमेदवारांची आसूं शकता.
आमी फक्त आमचेच नजरेन पळयतात. दुसरे वटेनचो विचार आतां आमी करपाक जाय. आतां ही दुसरी वाट म्हळ्यार कंपनींची. जे कंपनींत आमी नोकरी सोदतात, तांची गरज कितें आसू शकता, हांचो विचार सदांच करपाक जाय. आनी तुमकां तुमच्या अभ्यासक्रमान नोकरी मेळपाक कठीण. हाका लागून म्होंवा मूस जसो म्होंव लागीं करता तशी आमी ही म्हायती शिकप करतनाच लागीं करपाक जाय. कंपनीक जाय पडटात ते कुशळटायेचे उमेदवार. एखाद्याक घेवप, मागीर प्रशिक्षण दिवप हातून कंपनींचो वेळ आनी पयशे खर्च जातात. आनी प्रशिक्षण घेतिल्लो उमेदवार सोडून गेलो तर? पयशे आनी वेळुय फुकट वता. हाका लागून बेरोजगारांची संख्या वाडिल्ल्या कारणान कंपनी लेगीत फाव ते उमेदवार सोदूक पर्याय मेळटा.
आदल्या तेंपार घरांतली गृहिणी नोकरी करपाक भायर वच नाशिल्ली, पूण बिराड संस्कृती आयली आनी आर्थिक मळार घटमूट जावप गरजेचें जावपाक लागलें, त्या भितर आरक्षण आयले आनी नोकरी भितरली सर्त वाडपाक लागली. तातूंत आतां गोंयां भायल्या उमेदवारा कडेन तुमकां टक्कर दिवपाक जाय. हालीं जो मेळावो जालो तातूंत थळाव्यां परस गोंयां भायल्या तरणाट्यांची संख्या चड आशिल्ली. रोजगार विनिमय नोंदणी कार्ड नाशिल्ल्यान जायत्या जाणांक संद मेळूंक ना. ह्यो सगळ्यो गजाली आमच्या हातांत आसा. रोजगार कार्ड करप, ताचें नूतनीकरण करप, उपरांत नोकरी जर लागली तर ती तिगयता आमचे भितर कुशलटाय येवपाक हांवे कितें केले? हांची समाधानकारक जाप दिवपाक येवपाक जाय. ही जाप तुमकांच दिवपाची आसा.
एखादो मनीस तुमच्या फुड्यांत येता तेन्ना ताका योग्य मार्गदर्शन तुमी दिवपाक जाय. ताका जर तुमी म्हाका खबर ना, अशी जाप दिली तर तें योग्य न्हय. आदीं तुमी नोकरेक लागले उपरांत थंयचे वरिश्ठ तुमका प्रशिक्षण ना जाल्यार एखाद्या वरिष्ठ कर्मचाऱ्याचें मार्गदर्शन तुमका मेळत हाची वेवस्था करताले. आतां ही जबाबदारी कोण घेतलोच, हाची खात्री दिवपाक जायना. काम खंयचें आसूं, ताका कुशळटाय जाय आसता. ती जर तुमी आदींच शिकून घेतली तर नोकरी मेळपाचे नजरेन तुमकां मजत जाता. आतां तर सरकारी नोकरी घेतिल्ल्यांक अणभव गरजेचो आसा, अशे खुद्द मुख्यमंत्र्यान म्हळां. हाचो अर्थ काडल्यार तुमचे मदीं फाव ती कुशलटाय आसपाक जाय, ही अपेक्षा आसा.
तुमी जर दिसाळें वाचपाची संवय लायश्यात तर तुमी चालू घडामोडी लक्षांत तर दवरतलेच खेरीज तुमच्या उलोवपान ताचो बरो परिणाम दिसपाक लागतलो. विंगड विंगड विशय तुमच्या वाचनांत येतले, हाका लागून चारूय दिकांची म्हायती मेळप शक्य जातलें. हे वाचपाचो नेम आसुंदी. कार्यालयान जी भास आमी उलयता ताचेर प्रभुत्व आसचें हे खातीर ते भाशेंतलीं पुस्तकां वाचप ते भाशेंतल्यान उलोवप सुरु केल्यार बरें. तुमी खंयच्या ऑफिसांत कामाक लागपाचें हें आतां सांगप कठीण, पूण जें काम तुमकां दिसले ताचो अभ्यास करात. हें मार्गदर्शन तुमकां तुमच्या कार्यालयांतल्या ज्येश्ठां कडल्यान घेवचें पडटलें. फक्त कार्यालयांतलेच मनीस न्हय तर जे कोण तुमच्या संपर्कांत येतले तांकां बरीं उतरां दिवपाक शिकात. ह्यो गजाली तुमी नोकरी लागचे पयलीं सावन करूं शकतात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
