भांगरभूंय | प्रतिनिधी
अामच्या भारतांत रोजगाराची समस्या दरवर्सा कठीण जायत चल्ल्या. नोकरी मेळोवपांत अपेस येता म्हणून 45 कोटीं परस चड लोकांनी नोकरी पसून सोदपाचें बंद केलां. सेंटर फॉर मॉनिटरिंग इंडियन इकॉनॉमीच्या (सीएमआयई) रिपोर्टा प्रमाण, काम मेळना म्हणून नाराज जाता त्या लोकां मदीं बायलांचें प्रमाण चड आसा. तांकां तांचे योग्यतेचीं कामां मेळनात.
देशांत लोकसंख्येच्या हिशोबान 2017 ते 2022 मेरेन कामगारांची संख्या 46 % वयल्यान 40% जाल्या. रोजगार वाडचे बदला 2.1 कोटी कामगारांनी कमी जाला. भारतांत सद्यां 90 कोटी लोक रोजगार करपाक पात्र आसात. तातूंन 45 कोटीं परस चड लोकांनी काम बी सोदपाचें बंद केलां. सोसायटी जनरल जीएससीचे (बंगळुरू) अर्थतज्ज्ञ कुणाल कुंडू हांच्या म्हणण्या नुसार रोजगाराची सद्याची स्थिती भारतांत आर्थिक असमानताय वाडयता. हाका ‘k’ शेप वृद्धी म्हणटात. हेच खातीर गिरेस्तांचें उत्पन्न खूब वाडता तर गरिबांचें वाडना. भारतांत चडश्या सामाजिक आनी कुटुंबीक कारणां खातीर बायलांक रोजगाराची खुब कमी संद मेळटा.
सीएमआयईचे महेश व्यास हांच्या म्हणण्या प्रमाण, खूबश्या वेवसायांनी बायलांचें प्रमाण नांवां पुरतें आसा. ह्या कारणां खातीर योग्यता आसुन सुद्धा फक्त 9 % बायलां कडे काम आसा वा तांचो कामाचो सोद चालू आसा.
एसबीआयच्या एका रिपोर्टा नुसार, सरकार आता चलयांची लग्नाची पिराय 18 वयल्यान 21 चेर व्हरपाचे तयारेंत आसा. ह्या कारणां खातीर तांकां शिकपाची बरी संद मेळटली. परिणाम, रोजगाराचे बाबतींत बायलांचे स्थितीत सुदारणा जातली.
तज्ज्ञांच्या दाव्या प्रमाण, भारतांत 90 कोटी लोक रोजगार करपाक योग्य आसात. हातूंत चडशे तरणाटे आसून तांची पिराय वाडात चल्ल्या. विश्वाच्या बाकी देशांत उत्पन्नाची गती वाडत आसा. अशेंच जर उरलें तर भारतात सगळ्यात चड मनीसबळ आसून सुद्दां प्रगतीची संद वगडावन बसतलें. कारण भारतात सगल्यांत चड तरणाटीं भुरगी आसात. सोंपें भाशेंत सांगप म्हणल्यार भारतीय प्रौढ जातात, पूण तेच बरोबर ते गिरेस्त मात्र जायनात.
एमएसएमई मंत्रालयाच्या भरती पोर्टलाचेर 12 म्हयन्यांत रोजगार इच्छुकांचे संख्येत 86 % आनी पद संख्येत 71% ची घसरण जाल्या. एमएसएमई टूल रूम्स आनी टेक्निकल इन्स्टिट्यूशनांतल्यान 4, 77, 083 तरणाटे पास जावन गेले. पोर्टलाचेर मात 133 पदां खाली आसात. पोरूं 936 पदां खाली आशिल्ली.
फेब्रुवारी म्हयन्यांत ईपीएफओक जोडिल्ल्या नवीन वांगड्यांची संख्या 8.40 लाख आसा. तर 9.35 लाख ईपीएफओच्या भायर गेले. ईएसआयसी अंतर्गत नव्या वांगड्यांची संख्या फेब्रुवारींत 3.3% उतरली. एनपीएसच्या सदस्यांची संख्याय 0.59 % उतरली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
