भांगरभूंय | प्रतिनिधी
पराग सबनीसः भाजपान लोकशायेची हत्या केल्ल्याचो दावो
भांगरभूंय । प्रतिनिधी
सांगें: मंत्री निलेश काब्राल हांकां स्वताची जापसालदारकी खबरूच ना, हें विवीध सोशल मिडियाचेर अपलोड केल्ल्या व्हिडियो वयल्यान दिसता. विधीमंडळ कामकाज मंत्री निलेश काब्राल हांणी काँग्रेस आमदारांक विधानसभेच्या निकशांचेर प्रवचनां दिवपाचें बंद करचें आनी भाजपा सरकारान लोकशायेची हत्या केल्ले खातीर गोंयकारांची माफी मागची, अशी मागणी कुडचडें गट काँग्रेस अध्यक्ष पराग सबनीस हांणी केल्या.
मडगांवच्या दक्षीण गोंय जिल्हो कार्यालयांत बुधवारा काँग्रेस स्थापनी दीस मनयलो. ह्या वेळार सबनीस उलयताले. ह्या वेळार तांचे वांगडा काँग्रेस प्रदेशाध्यक्ष अमीत पाटकार, खासदार फ्रांसीस सार्दिन, एम. के. शेख, सावियो डिसिल्वा हाजीर आशिल्ले.
विरोधी पक्ष फुडारी युरी आलेमांव आनी हेर काँग्रेस आमदारांनी ‘नव्या आमदारांचो’ टॅग वापरचो न्हय. ह्या विधीमंडळ कामकाज मंत्री निलेश काब्राल हांणी केल्ल्या विधानाचेर सबनीस प्रतिक्रिया दिताले. दोन खेपे मंत्री जावन लेगीत काब्राल हांकां अजून आपल्या खात्याची जापसालदारकी खबर ना. तांणी पयलीं स्वताची लागणूक समजून घेवची, अशेंय सबनीस हांणी सांगलें.
भौशीक बांदकाम खात्यांत आनी पर्यावरण खात्यांत भ्रश्टाचार मातला. हाची एक देख म्हणल्यार नव्या जुवारी पुलाचेर कसलीच परवानगी घेनासतना वीज जोडणे सयत आशिल्लो फ्रीज, आझाद मैदाना कडेन मदींच खचिल्लो रस्तो, दर्यादेगांचेर बेकायदो हॉटेलां कडल्यान दर दिसा जावपी आवाजाचें प्रदुशण. विरोधी पक्ष फुडारी आलेमांव हांणी बसका आपयले उपरांत सातूय विरोधी आमदार एकठांय आयिल्ल्यान भाजपा सरकार भियेलां, ही वस्तुस्थिती. भाजपा सरकारा खातीर हो एक व्हड धपको, अशें सबनीस हांणी सांगलें.
काँग्रेसीचे तिनूय आमदार आनी पक्ष संघटणा एकवटींत आसा. आमच्या फुडाऱ्यां विशीं वगीच कितेंय आमी आयकून घेवचे नात. आमी गोंयकारांचो आवाज जावन रावतले, अशें सबनीस हांणी सांगलें.
ह्या वेळार काँग्रेसीचे ज्येश्ठ कार्यकर्ते सदानंद ठाणेकार, लॉरेन्स गोन्साल्वीस, चंदा वेळीप, अरविंद फर्नांडीस, विश्वासराव नागवेंकार हांचो सत्कार केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
