भांगरभूंय | प्रतिनिधी
पणजी : दर्यादेगो नितळ दवरप ही दरेकल्याची जापसालदारकी. फुडले पिळगेक नितळ दर्यादेगो दिवपाक आता पसुनूच तांची नितळसाण राखप गरजेचें, अशें मुख्यमंत्री डॉ. प्रमोद सावंत हांणी सांगलें. ‘आझादी का अमृत महोत्सव’ तशेंच प्रधानमंत्री नरेंद्र मोदी हांच्या वाडदिसा निमतान देशभर ‘नितळ दर्या, सुरक्षीत दर्या’ मोहीम सुरू आसा. गोंयांत हे मोहिमेचें उक्तावण शेनवारा मुख्यमंत्र्यी डॉ. सावंत हांचे हस्तुकीं मिरामार दर्यादेगेर जालें.
ह्या वेळार तांचे वांगडा केंद्रीय राज्य मंत्री श्रीपाद नायक, मंत्री बाबूश मोंसेरात, भाजपाचे प्रदेशाध्यक्ष सदानंद तानावडे, आमदार देविया राणे, रूडॉल्फ फर्नांडीस, मुख्य सचीव पुनीत कुमार गोंयल आनी विवीध खात्याचे अधिकारी तशेंच विद्यार्थी हाजीर अाशिल्ले.
गोंयाक 104 किमि. ची दर्यादेग लाबल्या. ही पुराय दर्यादेग नितळ दवरप दरेक गोंयकारांची लागणूक. गोंयचे पर्यटन वाडोवपा खातीर दर्यादेगो नितळ आसप गरजेचें. प्रधानमंत्री नरेंद्र मोदी नितळसाणीचो संदेश लोकांक दिला. गोंयच्या दर्यादेगो संवसारांत फामाद आसून पर्यटकांक ताचे आकर्शण आसा. ते खातीरूच दर्यादेगो नितळ आसपाक जाय. वर्साचे 365 दिसूय दर्यादेगो नितळ दवरपाक जाय, अशें मुख्यमंत्र्यान सांगलें.
सध्या देशभर ‘नितळ दर्या, सुरक्षीत दर्या’ मोहीम सुरू आसून ताचोच एक भाग म्हूण गोंयांतूय ही मोहीम राबयल्या, अशें केंद्रीय राज्य मंत्री श्रीपाद नायक हांणी सांगलें.
ह्या वेळार मुख्यमंत्री डॉ. प्रमोद सावंत हांचे सयत हेर मंत्री, आमदारांनी दर्यादेगेर नितळसाण करून नितळसाणीचो संदेश दिलो. ह्या वेळार मुख्यमंत्र्यानी सगल्यांक नितळसाणेचो सोपूत दिलो.
मजगतीं, शालेय विद्यार्थ्यांनी दर्यादेगेर पथनाट्या वरवीं नितळसाणीचो संदेश दिलो. हे नितळसाण मोहिमेंत विवीध सरकारी खातीं, बिगर सरकारी संस्था तशेंच हेर वांगड्यांनी मोट्या प्रमाणांत वांटो घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
