भांगरभूंय | प्रतिनिधी
देऊ राऊत: माडवेश्वर वाठारांत साळ पंचायती वतीन नितळसाण मोहीम राबयली
दिवचल: नितळसाण ही एक समाजसेवा. दरेकल्यान नितळसाणे खातीर आपलें योगदान दिवचें. जाक लागून वाठार नितळ उरतात आनी वातावरणूय उमेदी आसता. सैमाची राखण जाता आनी समाजसेवा केल्ल्याचेंय समाधान मेळटा अशें उपसरपंच देऊ (आपा) मधुकर राऊत हांणी मांडवेश्वर वांठारांत आयोजीत नितळसाण अभियाना वेळार सांगलें.
दिवचल म्हालांतल्या साळ ग्रामपंचायत आनी खोलपेवाडी हांगच्या छत्रपती शिवाजी खेळां आनी सांस्कृतीक मंडळ हांच्या जोड पालवान साळ हांगच्या श्री माडवेश्वर वाठारांत नितळसाण मोहीम राबयल्ली.
ह्या वेळार सरपंच सावित्री घाडी हांणीय आसपाव घेतिल्लो. तशेंच छत्रपती शिवाजी खेळां आनी संस्कृतीक मंडळाचे अध्यक्ष रामदास वरक, आदले पंच देविदास नायक, पंचायत सेक्रेटरी पुंडलीक गवस, सहसचीव शांबा घुरे, आनंद राऊत, दत्ताराम परब, साजरो घाडी, मंडळाचे सचीव मंदार पाटील, दुर्वा राऊत, महादेव रेडकार, ऋषभ रेडकार आनी हेर हे नितळसाण मोहिमेंत वांटेकार जाल्ले. श्री माडवेश्वर मळ आनी हांगच्या सभा मंडपाच्या भोंवतणचे कागदाचे कुडके, प्लास्टीक बाटल्यो तशेंच प्लास्टीक पोतयो तशेंच हेर कोयर एकठांय केलो. सरपंच सावित्री घाडी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
