भांगरभूंय | प्रतिनिधी
स्नेहा सबनीस हांकां नित्या युवा पुरस्कार: 29 मेक भेटयतले पुरस्कार
भांगरभूंय । प्रतिनिधी
मडगांवः भांगराळें गोंय अस्मिताय संस्थेचे भांगराळो गोंयकार पुरस्कार ज्येश्ठ स्वातंत्र्य सैनीक आनी साहित्यीक नागेश करमली हांका फावो जाला तशेंच नित्या युवा पुरस्कार स्नेहा सबनीस हांकां फावो जाला, अशी म्हायती संस्थेचे अध्यक्ष राजेश प्रभू हांणी पत्रकार परिशदेत दिली. 29 मे आयतारा वेर्णा महालसा नारायणी देवळाच्या सभाघरांत सांजेच्या 5 वरांचेर पुरस्कार भेटवण सुवाळो जातलो, अशें ताणी सांगलें. ह्या वेळार सचीव संदीप प्रभुदेसाय, भांडारी पंकज नमशीकार, सुरज कोमरपंत, उदय गुडे, दिलीप नायक हाजीर आसले.
नागेशबाबांचो जल्म 1933 वर्सा काकोड्यां जालो. 1952 वर्सा सावन गोंयच्या मुक्ती संग्रामांत तांणी म्हत्वाचें योगदान दिलां. सप्टेंबर 1954 ते मे 1959 ह्या काळांत ते रेयश मागूश बंदखणींत आशिल्ले. तेन्ना तांणी जोत ह्या हस्तलिखिताचें संपादन केलां. मागीर ते आकाशवाणीचेर कामाक लागले. 1992 वर्सा तांच्या वंशकुळाचें देणे कविता संग्रहाक साहित्य अकादेमीचो पुरस्कार फावो जाला. 1996 वर्सा कोची- केरळांतल्या अ. भा. साहित्य संमेलनाचे अध्यक्ष. गोवा कोंकणी अकादेमीन साहित्य प्रतिभा जिवन गौरव पुरस्कार भेटोवन सन्मान. गोवा कोंकणी अकादेमी, कोंकणी भाशा मंडळ सारख्या संस्थांच्या स्थापनेंत महत्वाचें योगदान. गोंय स्वातंत्र्य सैनीक संघटनेचे अध्यक्ष म्हूण तीन कार्यकाळ वावर. जनमत कौल आनी कोंकणीच्या सगल्या चळवळींक मोलाचें योगदान. जोरगत (1979), सांवार (1979), वंशकुळाचें देणे (1989), थांग अथांग (2007) सारखे कविता संग्रह प्रकाशीत जाल्यात. मोहन राकेश हांचें आधे अधुरे नाटक कोंकणीत अनुवादीत केलां.
स्नेहा सबनीस- नित्य युवा पुरस्कार
स्नेहा सबनीस राजभास संचालनालय, गोंय सरकार हांगां तें अनुवादक म्हूण काम करता. ते एक बरें अनुवादक आनी लेखक. गोंय सरकाराच्या साबार वॅबसायट तशेंच सरकारी कागदपत्रांचो ताणे कोंकणी अनुवाद केला.
सद्या तें कोंकणी भाशा मंडळ, गोंयचें जोड सचीव म्हणून कार्यरत आसा. स्टोरीव्हिवर ह्या प्रथम बुक्साच्या ऑनलायन पोर्टलाचेर 50 वयर काणयांची पुस्तकां, अरविंद गुप्ता हांचे वॅबसायटीवेल्या साबार बाल साहित्याचीं पुस्तकां ताणें अणकारित केल्यांत. ते भायर एन.सी.ई.आर.टीच्या पुस्तकांचो तशेंच तांच्या फिरकी ह्या मासिका खातीर कोंकणी साहित्याचो अनुवाद केला.
मंडळाच्या ऑनलायन कोंकणी शब्दकोश एप, शिक्षणीक आनी हेर ऑनलायन साहित्य टिमीचें तें वांगडी आसा. कोंकणी सुविचार टिमीचें तें वांगडी ध्यास कोंकणी ह्या नांवान वेबसायट सुरू करून कोंकणी भाशेंत गरजेचें आशिल्लें साबार साहित्य निर्माण करपाच्या वावराक तें लागलां.
नित्यानंद नायक कोंकणी चळवळींतले एक संघटक, आयोजक, कलाकार. भांगराळें गोंय हे संस्थेचे ते संस्थापक वांगडी. शिक्षक ह्या नात्यान वावुरतना तांणी साबार विद्यार्थ्यांक कोंकणी चळवळींत सक्रीय केले. 1 मे 2020 दिसा तांकां पिरायेच्या 48 व्या वर्सा काळजाच्या आताकान मर्ण आयलें. तांच्या उगडासाक हो नित्य युवा पुरस्कार भेटयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.