नव्या वर्सा नवे हावेस, नवीं सपनां

भांगरभूंय | प्रतिनिधी

भावंडांनो,
आमच्या सदच्या जिवितांतलो एकेक दीस कशे तरेन गेलो आनी 2023 वर्स आयज सोंपता हें कळ्ळेंच ना न्हय? आयचो दीस परथलो की 2023 वर्स आमचो निरोप घेतलें आनी नवे हावेस, नवे संकल्प, नवीं सपनां, नव्यो इत्सा बाळगिल्लें नवें वर्स 2024 उमळशिकेन आपलें पावल आमच्या जिवितांत घालतलें. भावंडांनो, ताका आमी उर्बेभरीत येवकार दिवया, तेचपरी ते आदीं तितलेच खोशयेन 2023 क निरोपय दिवया हा.
तुमकां सगल्या ल्हान व्हडा भावंडांक 2024 नव्या वर्सा निमतान म्हज्यो काळजा सावन परबीं. तुमकां बरी भलायकी आनी नेमान ’यश’ आवंडेतां. नवें वर्स तुमकां धादोसकायेचें तशेंच सुखसमृद्धीचें थारूं इतलें देवालागीं मागतां.
भावंडांनो, आमकां आमचो फुडार खबर ना. पुणून फुडार बरो घडोवपाक जाय जाल्यार आमी कितें करूंक जाय हें आमगेल्या जाण्टेल्यांनी आमकां शिकयलां. देखूनच म्हणटां, 2023 हें वर्स जें पासार जाता, तातूंत कितल्योय वायट घडणुको घडून वचूं, तांणी आमचें जिवीत बदल्लां आसूं , पुणून तातूंतल्यान आमी तड मारल्या. देखून हें वर्स आमचे खातीर तरी बरें गेलां अशेंच म्हणचें पडटलें. मात, आमी आमचो भूतकाळ विसरूंक फावना. नवें वर्स आमचे खातीर कितें नवें घेवन येतलें हांची आमकां सुलूस ना, तरी आसतना भूतकाळाची याद सदांच दोळ्यांमुखार दवरून आमी फुडाराचें पावल जतनायेन उखलूंक जाय.
नव्या वर्साच्या नव्या वातावरणांत येता तो दीस व्हड अनी भोव म्हत्वाचो आसा हें मतींत दवरूनच आमी आमचीं कामां ’आयचे आयज’ करूंक जाय. आमची उदरगत मागीर ती खंयच्याय मळार आसूं, ती हातासतलो जाल्यार वेळ वगडायनासतना नेमान वावुरपाक जाय. तेन्नाच बऱ्या फुडाराचीं फळां आमकां चाखूंक मेळटलीं.
देखून म्हणटां भावंडांनो, आमी आमच्या पर्जळीत फुडारा खातीर सगळ्यां कडेन मायेमोगान, एकचारान, मनांतल्यान दुस्वासाची कीड मारून उडोवन एकामेकांच्या सांगातांत, ल्हान व्हडांच्या उतरांक मान दिवन, हांसत-खेळत जियेवपाचो संकल्प नव्या वर्साक येवकार दितना करूया जें कितें आमी आचरणांत हाडटलीं तें आपणाल्या आनी हेरांच्या बऱ्याक पडटलें अशेंच येवजून दरेक गजाली नव्या वर्सासावन आचरणांत हाडुया.
बरें तर भावंडांनो, परतून तुमकां नव्या वर्साची परबीं भेटयतां आनी ह्या आंगणांत व्हडा खोशयेन तुमकां येवकार दितां येयात

• उल्हासभाई