भांगरभूंय | प्रतिनिधी
मुख्यमंत्री, राज्यपालान जनतेक भेटयलीं परबी
पणजी, प्रतिनिधी : हें 2023 वर्स सोंपपाक आतां कांय वरां शिल्लक उरल्यांत. हाका लागुन इश्ट, शेजारी, सोयरे, कार्यालयीन सहकारी हांकां मोबयलाचेर हॅप्पी न्यू ईयर, नव्या वर्साचीं परबीं अशे संदेश धाडपाक सुरवात जाल्या. दर्यादेगो तशेच हॉटेलां पर्यटकांनी फुलून गेल्यांत. गोंय हें संवसारांतले एक मुखेल पर्यटन थळ. सगळ्यांत चड पर्यटक 31 डिसेंबराक आसतात. हाका लागुन सगळ्यांत चड पार्ट्यो तेच रातीं जातात. पर्यटक आनी गाडयांच्या गर्देक लागून येरादारीची कोंयडी जायत आसा.
2023 वर्साच्या निमणे दिसा मुख्यमंत्री डॉ. प्रमोद सावंत आनी राज्यपाल श्रीधरन पिल्लय हांणी गोंयकारांक परबीं दिल्यात.
2023 त ज्यो चुको आमचे कडल्यान जाल्यो, ताचे पसून दर एकल्यान धडो घेवपाची गरज आसा. सुधारणा करपा सयत नवे संकल्प करुन गोंय स्वयंपूर्ण करपाक दर एकल्यान हातभार लावचो, असो संदेश मुख्यमंत्री डॉ. सावंत हांणी दिला.
नव्या वर्सा नवी कामगिरी करपा खातीर दर एकल्यान सुधारणा आनी नवे संकल्प करपाक जाय, अशें राज्यपाल श्रीधरन पिल्लय हांणी संदेशात म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
