भांगरभूंय | प्रतिनिधी
कुजिराच्या व्ही धेंपो उच्च माध्यमीक विद्यालय दिल्ली जावपी 17 वर्सां पिराये सकयले सुब्रतो करंड फुटबॉल सर्तीचे राष्ट्रीय फेरये खातीर गोंयचें प्रतिनिधित्व करतलो.
राज्य पांवड्या वयले फायनलींत धेंपो उच्च माध्यमीक विद्यालयान नावेलीच्या रोझरी उच्च माध्यमीक विद्यालयाच्या पंगडाक 3-2 अशा गोल फरकांनी हारयलो. एका वेळार धेंपो एका गोलान फाटीं आशिल्लो.
खेळां आनी युवा वेव्हार संचालनालयान म्हापशें-पेडेंच्या खेळां संकूल मैदानाचेर फायनलींचें आयोजन केल्लें. राष्ट्रीय फेरी फुडल्या म्हयन्यांत खेळयतले. जैतिवंत पंगडाक शारिरीक शिक्षण शिक्षक चेतन कवळेंकार आनी विशाल भंडारी हांचें मार्गदर्शन लाबलें.
मध्यांतरा मेरेन दोनूय पंगड 1-1 अशे बरोबरींत आशिल्ले. पयलो गोल रोझरीच्या साल्वादोर गामान केलो. जाल्यार तोपोन मिंजान पॅनल्टी किकीचेर गोल करून धेंपोक बरोबरींत हाडलो.
दुसऱ्या अर्दांत रौनल वळवयकारान धेंपोक 2-1 अशी आघाडी मेळोवन दिली. पूण, ताची ही आघाडी चड वगत तिगूंक ना. एशर फर्नांडीसान नावेली वतीन बरोबरीचो गोल केलो.
मॅचींतलो म्हत्वाचो गोल धेंपोच्या मर्फी फर्नांडीसान केलो. ताणें गोल करून धेंपो 3-2 अशा फरकान जैत मेळोवन दिलें, तशेंच धेंपोची दिल्लीची तिकेट लेगीत निश्चीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
