भांगरभूंय | प्रतिनिधी
गोंय विद्यापिठान आयोजीत केल्ले आंतरम्हाविद्यालयीन बॅडमिंटन सर्त एस एस धेंपो म्हाविद्यालय आनी गोंय अभियांत्रिकी म्हाविद्यालय हाणें वळेरेन बायलांच्या आनी दादल्यांच्या गटांत जिखली. गोंय विद्यापिठान पेड्डेंच्या साग खेळां संकुलांत सर्तीचें आयोजन केल्लें.
बायलांच्या गटांत जाल्ले फायनलींत कुजिराच्या एस एस धेंपो कॉमर्स आनी इकॉनॉमिक्स म्हाविद्यालयान सेंट झेवियर्स म्हाविद्यालयाक 2-1 अशा फरकांनी हारयलें.
पयले एकोडे मॅचींत धेंपोचे यास्मिन सय्यदान सुनिधी वाडेराक 21-0 आनी 21-2 अशा गेमींनी हारयलें. दुसरे मॅचींत साची ढवळीकारान सिनिक्का सापेकोक 2-1 आनी 21-3 अशा फरकांनी हारोवन मॅचींत बरोबरी सादली. बायलांच्या दोट्टी गटांतली मॅच उमळशीक वाडोवपी थारली. धेंपोच्या यास्मिन सय्यद आनी समिक्षा पेडणेंकार हे जोडयेन साची ढवळीकार आनी सुनिधी वडेर आड जैत जोडून आपल्या पंगडाक वस्तादपण मेळोवन दिलें.
दादल्यांच्या गटांतले फायनलींत फर्मागुडीच्या गोंय अभियांत्रिकी म्हाविद्यालयान म्हापशेंच्या सेंट झेवियर्स म्हाविद्यालयाक 3-2 फरकान हारयलें. पयले मॅचींत मृणाल भातखंडेन मेनिनो डिसोझाक 15-21, 21-19 आनी 21-17 अशा फरकानी हारयलो. सोहम मांद्रेंकारान श्रेयस तेंडुलकाराक 21-16 आनी 21-8 हारयलो. पयले दोट्टी गटांतले मॅचींत रोहम मांद्रेंकार आनी मेनिनो डिसोझा हांणी सतेज खांडेपारकार आनी मृणाल भाटखंडे हे जोडयेक 21-10, 21-13 अशा फरकांनी हारयली. तिसरे एकोडे मॅचींत सोहम शेटान अॅण्ड्रियोन डिसौझाक 21-9, 18-21 आनी 21-10 अशा गेमींनी हारयलो. निर्णायक आनी दुसरे दोट्टी गटांतले मॅचींत श्रेयस तेंडुलकार आनी सोहम शेट हांणी अॅण्ड्रियोन डिसौझा आनी कौशिक साखळकार हे जोडयेक 21-11 आनी 21-9 अशा फरकांनी हारयली.
इनामां भेटवण सुवाळ्याक गोंय खेळां प्राधिकरणाचे प्रशिक्षक रॉय अॅथीद मुखेल सोयरे म्हूण उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.