भांगरभूंय | प्रतिनिधी
विधानसभेंत मुख्यमंत्री डॉ. प्रमोद सावंत हांचें आस्वासन
पणजी: गोंयांत पयलीं धिरयो जायत आसल्यो तरी उच्च न्यायालयान ताचेर बंदी हाडल्या. तरी लेगीत विधानसभा वांगड्यांच्यो भावना लक्षांत घेवन हे विशीं कायदेशीर विचार करतले. हे विशींचें खाजगी विधेयक लेगीत कायदो विभागा कडेन धाडून दिलां अशी म्हायती मुख्यमंत्री डॉ. प्रमोद सावंत हांणी दिली.
काल (बिरेस्तारा) विधानसभेंत आमदार जीत आरोलकार हांणी मांडिल्ल्या लक्षवेधी सुचोवणेचेर मुख्यमंत्री उलयताले. ताचे पयलीं हेर णव आमदारांनी धिरयोक खेळाचो दर्जो दिवन ताका कायदेशीर करपाची मागणी केली.
मुख्यमंत्री डॉ. सावंत हांणी म्हणलें, गोंयांतल्या दर्यादेग वाठारांनी धिरयो खेळ परंपरीक पद्दतीन आयोजीत करतात. पूण हाचे आड पीपल फॉर अॅनीमल हे संघटणेन उच्च न्यायालयांत धांव घेतिल्ली. उपरांत न्यायालयान धिरयाचेर बंदी घालपाचे आदेश दिले. न्यायालयान गृह खातें तशेंच पुलिसांक धिरयो आयोजीत करच्यो न्हय हे खातीर खर पावलां उबारपाक सांगलां. उच्च न्यायालय लेगीत हे विशीं निरिक्षण करीत आसा. ताका लागून गोंयांत धिरयो आयोजीत करप गुन्यांव आसा.
मुख्यमंत्र्यांनी म्हणलें, कांय वांगड्यांनी तामीळनाडूंतल्या जलीकट्टूचे उदाहरण दिलें. पूण थंय बैलांचे झूज लायनात. थंय धांवपी बैलाचे फाटीक धरून चडांत चड वेळ धरून दवरतात. गोंयांत उच्च न्यायालयाच्या आदेशा उपरांत 2022 ते 2024 मजगतीं धिरयो आयोजनां आड 10 खटले दाखल केल्यात. जाल्यार ह्या वर्सा 30 जून मेरेन 6 खटले दाखल केल्यात. न्यायालयाच्या आदेशा प्रमाण धिरयो आयोजनाचेर आळाबंद हाडपा खातीर कृती आराखडो तयार करून तो न्यायालयाक सादर केला.
ताचे पयलीं आमदार जीत आरोलकार हांणी म्हणलें, घटनेच्या कलम 29 प्रमाण लोकांक तांची भाशा, लिपी आनी संस्कृती सांबाळपाचो अधिकार आसा. गोंयांतल्या दर्यादेग वाठारांनी धिरयो हो संस्कृतीचो एक भाग आशिल्ल्यान तो कायदेशीर करप गरजेचें आसा. सरकारान कांय थारावीक वेळार आनी सुवातेर धिरयोक मान्यताय दिवची. जनावरांक दुखापत जावची न्हय हे खातीर लेगीत नेम तयार करचे. धिरयाे सुरू जायत जाल्यार पर्यटनाक लेगीत फायदो जावंक शकता.
धिरयोंतल्यान 500 कोटींचो महसूल शक्य
आमदार वेंझी व्हिएगश हांणी म्हणलें, पुराय गोंयांत धिरयोचे बरे मागपी खूब जाण आसात. हाका खेळाचो दर्जो दिवचो. सुरक्षेचे सगले नेम पाळून धिरयो कायदेशीर खेळ करीत जाल्यार हातूंतल्यान वर्साक 500 कोटींचो महसूल शक्य आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
