भांगरभूंय | प्रतिनिधी
भांगरभूंय । प्रतिनिधी
फोंडेंः राज्यांतल्या बाराव्या तालुक्यांत शेतकारांक थाकाय दिवपा वांगडाच 500 नवे शेतकार तयार करपाचो उदकास्रोत खात्याचो निर्धार आसा. खण वेवसाय रोखडोच सुरू जातलो तरी तरणाट्यांक कृशी वेवसाया कडेन व्हरपाचो यत्न सरकार करतलो अशें उदकास्रोत खात्याचो मंत्री सुभाष शिरोडकार हांणी धारबांदोड्या हांगा सांगलें.
धारबांदोड्या सरकारी कार्यालयांत सुभाष शिरोडकार हांणी बिरेस्तारा सकाळी भेट दिली आनी तालुक्यांतल्या लोकां कडेन चर्चा केली. ह्या वेळार तांच्या वांगडा थळावो आमदार गणेश गांवकार, उदकास्रोत खात्याचो मुखेल अभियंतो प्रमोद बदामी, दक्षीण गोंय जिल्हो पंचायत अध्यक्ष सुर्वणा तेंडुलकार, सहकार निंबधक विशाल गावणेकार, तालुक्याचो उपजिल्होधिकारी नीलेश धायमोडकार, मामलेदार लक्ष्मीकांत कुट्टीकार, सरपंच बालाजी गांवस आनी हेर अधिकारी आशिल्ले.
उदकास्रोत खात्या वतीन शेतकारांक शिंपणावळी खातीर उदक उपलब्द करून दिवपाचे सगळे यत्न करतले अशें सांगतना दूदसागर न्हंयेंत येवपी खोदूळ उदकाचें कारण सोदून काडपा खातीर एक समिती स्थापन केल्या अशी म्हायती तांणी दिली. हे समितींत तालुक्याचो मामलेदार, कालें, धारबांदोडें आनी किर्लपाल पंचायतीचे सरपंच, उदकास्रोत खात्याचे कार्यकारी अभियंतो अंकुश गांवकार हाचो आसपाव आसा. 31 ऑक्टोबर मेरेन तांका अहवाल दिवपाक सांगलां अशें शिरोडकारान सांगलें.
धारबांदोडें तालुक्यांत उदकाचो प्रश्न गंभीर जाला. तालुक्यांतल्या व्हांवपी न्हंयचें उदकाची हेर तालुक्यांक पुरवण करतात मात थळाव्या लोकांच्या पियेवपाच्या उदकाचो प्रश्न सुटावो करपाक बांदकाम खातें अपेशी थारलां अशें आमदार गणेश गांवकार हांणी शिरोडकार हांचे नदरेक हाडून दिलें. तालुक्यांतल्या पंचायतीचे सरपंच आनी हेर लोकांनी लोकांक तोंड दिवचें पडटा त्या समस्यांची म्हायती शिरोडकार हांका दिली आनी त्यो सुटाव्यो करपा संबंदी चर्चा केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
