भांगरभूंय | प्रतिनिधी
सरपंचपदाचेर अनिकेत साळगांवकार, उपसरपंचपदाचेर प्रिती कोनाडकार
भांगरभूंय । प्रतिनिधी
पेडणें: धारगळेच्या सरपंचपदाचेर आदले सरपंच भूषण उर्फ प्रदीप नायक हांची निवड जावपाची आशिल्ली. ज्या दिसा पंचायतींचो निकाल जाहीर जाले उपरांत नायक हांणी आपल्या समर्थकांक घेवन आपूण सरपंच जातलो, अशे फोटो समाज माध्यमांतल्यान व्हायरल केल्ले. पूण 22 ऑगस्टाक सरपंच, उपसरपंचाची निवड जावपाची आशिल्ल्या त्या वेळार एक महिला पंच अमिता हरमलकार किंग मेकर थारली. तांणी चडांत चड पंच वांगड्यांक आपले वटेन व्हरून भूषण नायक हांकां सरपंच करपा बदला अनिकेत साळगांवकार हांकां सरपंचाच्या कदेलाचेर बसयलो. ताका लागून एक पंच कितें करपाक शकता हाची धारगळ पंचायत वाठारांत नेटाची चर्चा सुरू जाल्या.
22 ऑगस्टाक धारगळ पंचायतीच्या सरपंच आनी उपसरपंचाची निवड जावपाची आशिल्ली. त्या संबंदांत व्हड प्रमाणाचेर राजकी घडामोडी घडल्यो आनी निमाण्या खिणाक भूषण नायक हाका कुशीक काडून अनिकेत साळगांवकार हांच्या नांवाची वट्ट पांच पंच वांगड्यांनी शिफारस केल्ल्यान नायक हांकां हार खावची पडली.
सरपंचपदा खातीर नायक आनी साळगांवकार हांचे उमेदवारी अर्ज आयिल्ले. हे वेंचणुकेंत साळगांवकार हाका पांच जाल्यार नायक हांकां स्वताचें धरून चार मतां पडलीं.
महिला उमेदवार अमिता हरमलकार जिखले उपरांत तीच सरपंच जातली अशी चर्चा चालू आशिल्ली. ते संबंदांत थळावे आमदार प्रवीण आर्लेकार हांचे कडेन तशे तरेची उलोवणी लेगीत जाल्ली. पूण निमाण्या खिणाक नायक हांची सरपंचपदाचेर निवड जातली अशी सुलूस लागतकच तिणें साळगांवकार हांच्या नांवाची शिफारस करून तांकां सरपंचाच्या कदेलाचेर बसोवपांत म्हत्वाची भुमिका केल्ल्यान ती किंग मेकर थारली. मजगतीं, राजकारणांत कितेंय जावपाक शकता. हाकाच लागून आपल्याक सरपंचपदा पसून पयस रावचो पडटा, अशें भूषण नायक हांणी सांगलें.
धारगळ पंचायत मंडळ
सरपंच अनिकेत साळगांवकार आनी उपसरपंच प्रिती कोनाडकार हांचे वांगडा पंचायत मंडळ दिप्तीशा नारोजी, अर्जुन कानोळकार, सतीश धुमाळ, दाजी शिरोडकार, अमित हरमलकार, दिलीप वीर आनी भूषण नायक.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
