भांगरभूंय | प्रतिनिधी
राजकी लाव घेवपाक दर्जो दिवपाचे यत्न, ‘आदि ब्रिगेडियर’चो आरोप
मडगांव, प्रतिनिधी : गावडा, कुणबी, वेळीप समाजाक २००३ त एसटीचो दर्जा मेळ्ळो. धनगर समाज हे संघटणेंतल्यान वेगळो आशिल्लो. २०११ च्या आंदोलनांतूय ते वांटेकार नाशिल्ले. राजकी आरक्षणाचो लढो गावडी, कुणबी, वेळीप समाज लढिल्ल्यान आतां तांकां येस मेळिल्ल्यान राजकी लावा खातीर धनगर समाजाक एसटी दर्जो दिवपाचो यत्न चालू आसा. हाका आमचो खर विरोध आसतलो, अशें पत्रकार परिशदेंत आदि ब्रिगेडियरच्या विनय वेळीप हांचे सयत केपेंच्या एसटी भावांनी सांगलें.
धनगर भावांनी आमदार एल्टन हांच्या वक्तव्याचेर घेतिल्ले पत्रकार परिशदेक जाप दितना केपेंच्या एसटी समाज भावांनी पत्रकार परिशद घेवन धनगर समाजाक एसटी दर्जो दिवपाक विरोध आशिल्ल्याचें मत मांडलें. विनय वेळीप हांचे वांगडा सरपंच अश्विनी गांवकार, मालू वेळीप, दत्ता वेळीप, सर्वानंद वेळीप, श्वेता गांवकार आनी हेर हाजीर आशिल्लीं.
विनय वेळीप हांणी, आदिवासी समाजाच्या मंत्री आनी आमदारांनीय राजकी आरक्षण मेळटलें अशें सांगलां. आदिवासी समाजाचो अडेज हजार कोटींचो निधी खर्च करूंक ना. कायद्यांत बसनासतना पर्याय उपलब्ध करुन तांकां एसटी दर्जो दिवचो न्हय. नातर गोयांतले हेर समाजूय तसोच एसटी दर्जो मागतले. मिशन पॉलिटीकलांतल्या १६ संस्थां मदली ‘आदी ब्रिगेडीयर’ ही एक संस्था आसा. महाराष्ट्रांतल्या आदिवासी समाजा कडल्यान हेर समाजाक एसटी दर्जो दिवपाक विरोध जाता. राज्यांतूय आमचो विरोध आसा. हे विशीं मिशन पॉलिटिकलचे फुडले बसकेंत मत मांडटले आनी जे कोण हे मागणेक साथ दितात हें स्पश्ट जातलें, अशेंय सांगलें.
२० वर्सां आमदार आशिल्ल्या आमदारांनी समाजाचे प्रस्न सोडयनासतना फकत आनी फक्त राजकारण केलें. आतां धनगर समाज आनी एसटी समाजांत झगडें लावपाचो यत्न करतात. धनगर समाजाक आदिवासी समाजांत आसपाव घेवपाक आमचो विरोध आसा. आदिवासी समाजान झगडून जें आरक्षण मेळयलां तातूंत हेर समाज बळयां घुसपाक शकनात. कायद्यान जें कितें जाता तें जावनी. पूण हाका आमचो विरोध कायम आसतलो अशें विनय वेळीप हांणी म्हणलें.
धनगर भावांक चुकीची म्हायती दिवन तांकां पत्रकार परिशद घेवपाक लायली. आमदार डिकॉस्टा हांणी सांगिल्ल्या गजालींचो आपल्याक जाय तसो अर्थ काडलो. आमदार डिकॉस्टा हांणी कोणाकूच उद्देशून वक्तव्य करूंक नाशिल्लें. तांणी फकत एक गजाल सांगिल्ली. धनगर समाजाचे फुडारी लोकसभेचे फाटभूंयेर समाजांत फूट घालपाचो यत्न करतात. गावडो, कुणबी, वेळीप हांकां एसटीचो दर्जो मेळ्ळो पूण धनगर समाजाक तो मेळूंक ना. २०११ त आंदोलन केल्लें तेन्ना धनगर समाजाचे हे फुडारी खंय आशिल्ले, असो प्रस्न वेळीप हांणी केलो.
एसटी समाजान २०११ त चार मतदारसंघ आरक्षीत करपाची मागणी केल्ली. आतां एसटी समाजाक राजकी आरक्षण मेळिल्ल्यान कांय राजकारणी हाचो फायदो घेवपाचो यत्न करतात. आमदार एल्टन डिकॉस्टा हांणी आमदारकी मेळिल्ल्याक आदिवासी समाजाचे खुबशे प्रस्न सरकारा कडेन, विधानसभेंत मांडल्यात. ताची फाटपुरवण केली. तांचेर कोणेय टिका केल्यार ताचें संरक्षण करतले अशेंय तांणी म्हणलें.
बाळ्ळीच्या लढ्या वेळार आदिवासी समाजाच्या दोगा तरणाट्यांक आपलो जीव वगडावचो पडलो. तेन्ना बाबू कवळेकार खंय आशिल्ले? भाजपाची कसलींच तत्वां कवळेकार पाळीनात. लोकसभा वेंचणुकेचे फाटभूंयेर पयशे दिवन लोकांक लागीं करपाचें काम सुरू आसा. राजकी लावा खातीर धनगर समाजाचो एसटीत आसपाव करपा खातीर ते यत्न करतात. धनगर समाजाक एसटी दर्जो दिवपाक आमचो खर विरोध आशिल्ल्याचें दत्ता वेळीप हांणी सांगलें.
मिशन पॉलिटीकल रिझर्व्हेशन फाॅर एसटी ह्यो विवीध संघटणांचो आसपाव आसा. केपेंच्या एसटी भावांनी घेतिल्ले पत्रकार परिशदेंतल्या धनगर भावांच्या आरक्षणाक विरोध आशिल्ल्याच्या मताचेर मिशन पॉलिटीकलाचें कसलेंच भाशण करचे ना. ती पत्रकार परिशद वेगळ्या कारणा खातीर घेतिल्ली. तातूंत कितें सांगिल्लें तें खबर ना अशें संस्थेचे सरचिटणीस रुपेश वेळीप हांणी सांगलें. हे विशीं आदीं केन्नाच चर्चा जावंक ना अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
