भांगरभूंय | प्रतिनिधी
भांगरभूंय । प्रतिनिधी
दिवचलः राष्ट्रपतीपदाचे वेंचणुकेक खातीर द्रौपदी मुर्मू हिका उमेदवारी दिवन पंतप्रधान नरेंद्र मोदी तशेंच भाजपान देशांतल्या अनुसूचीत जमातीक (एसटी) खऱ्या अर्थान मानाची सुवात दिल्या. गोंयातल्या एसटी लोकां वतीन आमी पंतप्रधान मोदी तशेंच मुख्यमंत्री डॉ प्रमोद सावंत हांचे उपकारी आसात अशें जिल्हो पंचायत वांगडी गोपाळ सुर्लकार हांणी एके पत्रकार परिशदेंत सांगलें.
समाजसेवा करून आपलें नांव देश पांवड्यार करपी, आमदार, मंत्री आनी राज्यपाल म्हणून काम करून प्रशासनांतली आपली कुशळटाय दाखोवन दिवपी मुर्मू हिका राष्ट्रपती उमेदवार करून एसटी समाजाक मुखेल प्रवाहांत हाडपाक सोदता हें भाजपान दाखोवन दिलां. मुर्मू राष्ट्रपती जातली हातूंत मातूय दुबाव ना. गोंयचे एसटी समाजांतल्या लोकांक ताची खूब खोस जातली अशें सुर्लकार हांणी सांगलें.
केंद्र सरकारान सबका साथ, सबका विकास, सबका विश्वास हो मंत्र करून दाखयतना भाजपच्या केंद्रीय फुडाऱ्यांनी आदिवासी समाजाक प्राधान्य दिलां. केंद्र आनी राज्यांतलें भाजपा सरकार अंत्योदय तत्वाचेर काम करता. फाटीं आशिल्ल्या समाजांक भाजपा सरकार फुडें हाडटा अशें प्रदीप गावडे हांणी सांगलें. मुर्मू हांका मतदान करून वेंचून दिवपाचें आवाहन शिवा मुळगांवकारान गोंयचे खासदार आनी आमदारांक केलां. पत्रकार परिशदेला गोंय राज्य एसटी मोर्चा सचीव शिवाजी जल्मी, उत्तर गोंय एसटी मोर्चा सचीव प्रदीप गावडे, साखळी एसटी मोर्चाचो अध्यक्ष शिवा मुळगांवकार, डिचोलीचो अध्यक्ष दयेश गावडे, मयेचो अध्यक्ष जयंत कवळेकर, सचीव ललना गिमोणकार हाजीर आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
