भांगरभूंय | प्रतिनिधी
विज्ञान – तंत्रज्ञान मंडळान लायला नेट
भांगरभूंय । प्रतिनिधी
पणजीः गोंयांतलें फामाद दोदोल ह्या खाणा सयत कुणबी साडयेक लेगीत जीआय मानांकन मेळोवपाचे यत्न विज्ञान- तंत्रज्ञान मंडळान चलयल्यात. जीआय मानांकना खातीर दोदलाचो प्रस्ताव जीआय निबंधकां कडेन धाडला. कुणबी साडयेचो प्रस्ताव लेगीत फुडल्या कांय दिसांनी धाडटले, अशी म्हायती मंडळाचे अधिकारी दीपक परब हांणी ‘भांगरभूंय’ कडेन उलयतना दिली.
हे आदीं गोंयांतली खोला मिरसांग, हरमलची मिरसांग, काजू फेणी, मायंडोळी केळी, गोंयचें खाजें, गोंयचो मानकुराद, गोंयचे काजू, आगशीचें वांयगें, सातशिरो भेंडो आनी गोवन बेबिंका ह्या वस्तूंक जीआय मानांकन मेळ्ळां. कांय म्हयन्यां आदीं मंडळान मांगेलाल आनी मुसारद आंबो, साळगांवचीं वांयगीं, कोरंगूड तांदूळ, घुमट, हुर्राक, काजू फ्रूट, कावी कला आनी कोकोनट फेणी हाची जीआय मानांकना खातीर शिफारस केल्ली. ते उपरांत आतां दोदोलची शिफारस केल्या. फुडल्या सप्तकांत कुणबी साडयेचो प्रस्ताव लेगीत सादर करतले, अशें परब हांणी सांगलें.
जीआय कित्याक गरजेचें?
एकादें उत्पादन विशिश्ट भागांतूच घेतात जाल्यार आनी त्या उत्पादनाक कांय विशिश्ट वळख आसत जाल्यार ताका जीआय मानांकन दितात. खंयच्याय उत्पादनाक जीआय मानांकन मेळ्ळें जाल्लयार त्या उत्पादनाचें उगमस्थान निश्चीत जाता. तशेंच फायदो आनी गुणवत्ता कायम दवरचे खातीर ताचो फायदो उत्पादकांक जाता. जीआय मानांकन हें उत्पादन आनी प्रदेशा कडेन संबंदीत आसा. कारण वेगवेगळ्या भुगोलीक परिस्थितीक लागून वेगवेगळे सुवातेर उत्पादन जावपी एकूच उत्पादन वेगवेगळ्या गुणवत्तेचें आसपाक शकता. ताका लागून गुणवत्तेची वळख कायम दवरचे खातीर हें मानांकन म्हत्वाचें थारता. जीआय मानांकना खातीर उत्पादकाक खूबशे अधिकार मेळटात. तशेंच भेसळयुक्त उत्पादनाची निर्मिती तशेंच विक्री करपाक आळाबंद येवं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
