भांगरभूंय | प्रतिनिधी
-केंद्रीय सांख्यिकी आनी अंमलबजावणी खात्याचो अहवाल
पणजी: गोंयांत डिसेंबर म्हयन्यांत किरकोळ म्हारगाय दर 3.24 टक्के आशिल्लो. केंद्रीय सांख्यिकी आनी अंमलबजावणी खात्याच्या अहवाला प्रमाण देशांतल्या हेर राज्यांचे तुळेंत गोंयांत म्हारगाय उणी आसा. किरकोळ म्हारगाय दर उणो अासपाचे क्रमवारींत गोंय देशांत पांचवे सुवातेर आसा. पुराय देशा खातीर होच दर 5.69 टक्के अाशिल्लो.
अहवाला प्रमाण, देशांत सगल्यांत उणो 2.81 टक्के म्हारगाय दर सिक्कीम राज्यांत आशिल्लो. उपरांत नागालँड (2.88 टक्के), अरुणाचल प्रदेश (2.99 टक्के), मिझोराम (3.29), गोंय (3.24 टक्के), जम्मू-काश्मीर (4.15 टक्के), केरळ (4.28 टक्के), छत्तीसगड (4.49 टक्के), मेघालय (4.7 टक्के), तमिळनाडू (4.97 टक्के), अस्तंत बंगाल (4.98 टक्के), झारखंड (5.2 टक्के), मध्य प्रदेश (5.15 टक्के टक्के), आंध्र प्रदेश (5.52 टक्के) ह्या राज्यांचो क्रमांक लागता.
डिसेंबर म्हयन्यांत देशांत सगल्यांत चड 12.86 टक्के म्हारगायेचो दर मणिपूरांत आशिल्लो. ते उपरांत ओडिशा (8.73 टक्के), गुजरात (7.07 टक्के), राजस्थान (6.95 टक्के ), हरियाणा (6.72 टक्के), महाराष्ट्र (6.08 टक्के), पंजाब (5.95 टक्के), बिहार (5.89), कर्नाटक (5.63 टक्के), तेलंगणा (5.63 टक्के), हिमाचल प्रदेश (5.23) ह्या राज्यांचो आस्पाव आसा.
केंद्रशासीत प्रदेशांचो विचार केल्यार दिल्लींत म्हारगाय दर सगल्यांत उणो 2.95 टक्के आशिल्लो. ते उपरांत अंदमान निकोबार जुंवे (2.99 टक्के), लक्षद्वीप (4.21 टक्के), पुदुचेरी (5.68 टक्के), दादरा नगर हवेली (7.47 टक्के) हांचो क्रमांक लागता.
केंद्रीय सांख्यिकी खात्या वतीन दर म्हयन्याक किरकोळ म्हारगाय दराचो अहवाल जाहीर जाता. डिसेंबर म्हयन्यांत भाजयो, कड्डणां हांचे दर परतून वाडिल्ले. ते खातीर नोव्हेंबराचे तुळेंत म्हारगाय वाडली. रिझर्व्ह बँक ऑफ इंडियेन म्हारगाय दर 4 टक्क्या मेरेन सकयल हाडपाचें लक्ष्य दवरलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
