देशाक परतून नरेंद्र मोदींची गरज

भांगरभूंय | प्रतिनिधी

सदानंद तानावडेः पर्यां महिला मेळाव्यांत उलो; अनुराधा पौडवालांचें रंगलें गायन

भांगरभूंय । प्रतिनिधी

वाळपयः प्रधानमंत्री नरेंद्र मोदी हांची परतून एकदां देशाक गरज आसा. तांच्या फुडारपणा खाला देशाचे सर्वांगी उदरगतीक चालना मेळ्ळी. सर्वधर्मसमभाव सांबाळून तांणी समाजांतल्या निमाण्या घटका मेरेन उदरगत पावयल्या. तांणी वेगवेगळ्या पांवड्यार चालीक लायिल्ल्या साबार कल्याणकारी येवजण्यांचो फायदो गोंयाक जाला. हे खातीर 2024 चे वेंचणुकेंत नरेंद्र मोदी हांकां परतून फुडारपण मेळोवन दियात, असो उलो राज्यसभा खासदार आनी भाजपा प्रदेशाध्यक्ष सदानंद तानावडे हांणी मारलो.

वाळपय आनी पर्यें मतदारसंघांतल्या पर्यें वाठारांत भुमिका मैदानार प्रधानमंत्री नरेंद्र मोदी हांच्या वाडदिसा निमतान आदले सांजेर आयोजीत केल्ल्या स्त्री मेळाव्यांत तानावडे उलयताले. सुमार 30 हजार बायलो ह्या मेळाव्याक हाजीर आशिल्ल्यो. नामनेची गायिका अनुराधा पौडवाल हांच्या आरती गायनान मेळाव्याक सुरवात जाली.

ह्या वेळार माचयेर भलायकी मंत्री विश्वजीत राणे, पर्येची आमदार डॉ. देविया राणे, समाज वावुरपी विनोद शिंदे, केरी जिल्हो पंचायत वांगडी देवयानी गांवस, नगरगांव जिल्हो पंचायत वांगडी सगुण वाडकार, उसगांव जिल्हो पंचायत वांगडी उमाकांत गावडे, केरीची सरपंच दीक्षा गांवस, भिरोंडे पंचायतीचे सरपंच उदयसिंह राणे, पिसुर्लेंचे सरपंच देवानंद परब, पर्येंची सरपंच रती गांवकार, म्हावूसचे सरपंच सोमनाथ काळे, ठाणेची सरपंच सरिता गांवकार, सांवड्डेची सरपंच उज्वला गांवकार, सरपंच नितेश गावडे, होंडाचे सरपंच शिवदास माडकार, नगरगांवची सरपंच संध्या खाडीलकार, उसगांवचे सरपंच रामनाथ डांगी हाजीर आशिल्ले.

गोंयांत आयज सर्वांगी उदरगतीक ओतो आयला. हाचें खरें स्रय नरेंद्र मोदी हांकां वता. तांणी व्हड प्रमाणांत निधी मेळोवन दिल्ल्यान गोंयचे सर्वांगी उदरगतीक सुरवात जाल्या. भलायकी आनी महिला सक्षमीकरणाच्या माध्यमांतल्यान भलायकी मंत्री विश्वजीत राणे हांणी बरो वावर केला. तांचे हात घटमूट करात आनी परतून एकदां मोदी हांच्या फुडारपणा खाला देशांत भाजपाक सत्तेर हाडचे खातीर दोनूय मतदारसंघांतल्यान भोवमत दियात, असो उलो तानावडे हांणी मारलो.

सनातन धर्माक हजारांनी वर्सांचो इतिहास आसा. कांय जाण तो नश्ट करपाचो यत्न करतात, पूण तो नश्ट जावचो ना, अशें मंत्री राणे हांणी सांगलें.

मोदी हांचे हात घटमूट करचे खातीर येता ते लोकसभा वेंचणुकेंत दोनूय मतदारसंघांतल्यान व्हड प्रमाणांत मतां मेळोवन दिवपाचें मंत्री राणे हांणी आस्वासन दिलें. तशेंच वाग वाठारा संबंदांत सरकारान कसलोय निर्णय घेवं, पूण सत्तरीच्या हिता खातीर आपली भुमिका आसतली, अशेंय तांणी ह्या वेळार स्पश्ट केलें.

भालयकी खातें फुडल्या दोन म्हयन्यां भितर चार मोबायल व्हॅन घेतले. दरेका घरा वचून बायलांची आनी ज्येश्ठ नागरिकांची तपासणी करतले. अर्थीक नदरेन दुबळ्या आशिल्ल्या 21 हजार कुटुंबांक अर्थीक मजत करतले, अशेंय मंत्री राणे हांणी सांगलें.

आयज सर्वसामान्यांचो सत्तेर आशिल्ल्या भाजपाचेर विस्वास वाडपाक लागला. दिल्लीं आस्वासनां पुराय जायत आसात, ताका लागून लोकसभा वेंचणुकेंत भाजपाक परतून एकदां सत्ता मेळटली, अशें डॉ. देविया राणे हांणी सांगलें. ह्या सुवाळ्यांत अनुराधा पौडवाल आनी खासदारपदार निवड जाल्ले खातीर सदानंद तानावडे हांचो शाल, नाल्ल आनी भेटवस्तू दिवन सत्कार केलो.