भांगरभूंय | प्रतिनिधी
ह्या वर्सा आशाढी एकादस आनी बकरी ईद एकाच दिसा आयलें. एकादशीचें कण्ण खावचें काय ईदाची बिर्याणी हो प्रश्न सगळ्यांक पडिल्लो आसतनाच बाबड्या सभापतीक मात कडक उपास घडलो म्हणपाचें सोशल मिडियाचेर वाचूंक मेळ्ळें. ईदाक कुर्बानीक म्हत्व आसता. गोंयचे काँग्रेस आमदार काँग्रेसीची कुर्बानी दिवंक ह्याच दिसा मुखार सरले. कांय जाणांचो घुस्मटमार कसोच सोंपना. आनी परिणाम तांकां हेवटेंतल्यान तेवटेन उडयो मारच्योच पडटा. पूण, सद्याक एकल्याक उडी मारूंक मेळना. राजिनामो दिवन परत वेंचणुकेक रावप तशें त्रासाचेंच. म्हणटकूच वांगडा भरो बांदून व्हरचो पडटा. सगळ्यांक पुंजायल्यात आनी ते येतात म्हणपाची खबर कळटकूच सभापती आयतार आसुनूय आपणाल्या कार्यालयांत पावलो आनी हे आतां येतले काय मागीर करीत वाट पळेत उरलो आनी एकादस सोपून दुवादस जाली तरी कोणाचो पत्तोच ना तें पळोवन निर्शेलो म्हणपाचें सगळे मिडियावाले उलयतात.
काँग्रेस फुट्टली म्हणपाचें सगळ्यांक खबर आशिल्लें आसूंक जाय. महाराष्ट्रांत शिवसेना फुटली आनी केदो बोवाळ जालो. कार्यकर्त्यांनी आपल्याच आमदारांचे पुतळे बी करून जाळ्ळे. ताचो व्हडलो उपयोग जरी जालोना तरी कार्यकर्ते आमदारांचेर बेजार आसात म्हणपाचें तरी कळ्ळें. पूण गोंयांत कितें? आमदार फुट्टात म्हणपाचें कळ्ळें तरी कोणाचोच आवाज ना. कार्यकर्त्यांचोय ना आनी मतदारांचोय ना. हाचोच अर्थ ‘ये तो होना ही था’ म्हणपाचे सगळ्यांक खबर आशिल्लें आनी ताणीं तें मानून घेतिल्लें आसूंक जाय. मतदारांक कितें, हातांत नोट मेळटकूच जाली. मागीर कोण वेंचून येता, तो खंय वता आनी कसले दिवे लायता हाचें तांकां पडुनूच गेल्लें आसना. तांकां दिता जो चिकन-सोरो, तांकां तोच आमदार बरो.
पूण हे फावट फुटूंक सोदपी आमदारांनी फकत मतदारांकूच न्ही तर देवाक लेगीत लजेक घालो म्हणचें पडटलें. तशें हांकां कोणें सांगूक नासलें. हेच जावन देवूळ, फुलां खुरीस, दर्गो सोदूंक गेल्ले. थंय ताणीं गाराणेंय घाल्लें. कोणूच हेवटेन तेवटेन करचोना म्हणपाचें देवा मुखार मानून घेतिल्लें. आनी आतां ते कितें करतात? असल्या दिगुराम-लोबुरामा खातिरूच तर कायदो केल्लो. दोन तृतियांवश पक्ष फुटलो तरूच ती फूट मान्य जावपाची. पूण सद्याक कितें चल्लां? कोणूय खंयच्याय चिन्हाचेर वेंचून येवं, वेंचून येतकूच तो आपणांक जाय तें करूंक मेकळो. इतले दीस विरोधक म्हणटाले, खंयचोय बटण दामात मत कमळाकूच. तें खरें अशें आतां दिसूंक लागलां. तुमी कोणाकूय वेंचून दियात ते सत्ते वटेन म्हणजेच कमळा वटेन गेल्ले दिसतले.
आनी हाकाच लागून दिसूंक लागलां आतां कायदो परत एक फावट बदलपाची गरज आसा. एकदां खंयच्याय चिन्हाचेर वेंचून आयलो म्हणजे ताका हेवटेन तेवटेन उडी मारूंक मेळूं जायना. जनता कोणाकूय वेंचून दिता ती पांच वर्सां खातीर म्हणटकूच एकदां तो वेंचून आयलो म्हणजे त्या मताक ताणें पांच वर्सां न्याय दिवंक जाय. ताका पक्ष बदलुंकूच न्ही जाल्यार दुसर्या पक्षाक तेंको लेगीत दिवंक मेळूंक जायना. आतां जाता कितें तर कोणूय उठ्ठा पक्ष स्थापन करता. त्या पक्षाचे एक वा दोन आमदार वेंचून येतात. ते आपणाल्या फायद्या खातीर मागीर सत्तेक लागीं आशिल्ल्याक तेंको दितात. कांय जाण अपक्ष म्हूण रावतात ते हेच खातीर. आज राजकारण हो एक धंदो जाला. ह्या राजकारण्यांनी तशें रूप दिलां म्हणुनूच तर बोल्सांत शंबर रुपया नाशिल्लो मनीस पांच वर्सां सत्तेर येतकूच अब्जाधीश जाल्लो पळोवंक मेळटा.
वेंचणुकेंत एका पक्षाक विरोध करून वेंचून आयिल्लो मनीस वेंचून येना फुडें त्याच विरोधी पक्षाक आपलो तेंको दिवन मंत्रीपद घेता हाचे सारकी लजेची गजाल आसचिना. जनतेन तो पक्ष नाका म्हणून तुमकां वेंचून दिल्यात हें कशें विसरतात हे लोक? काय एकदां मत दिलें तुमचें काम सोपलें अशें बी? हाकाच लागून दिसता परत एकदां कायदो बदलूंक जाय. जो कोण पक्ष बदलता मागीर तो पुराय पक्ष जायना तांची आमदारकी वचूंक जाय. इतलेंच न्ही तर तांकां ती विधानसभा भंग जायना तोंवेर परत वेंचणुकेक उबो रावंक मेळूंक जायना. मडगांव आनी केपेंच्या लोकांनी हाताक मत मारलां तशेंच मडकयच्या लोकांनी शिंवाक मत दिलां. तांच्यानी कमळाक मत दिवं येतालें. पूण तांकां कमळ नाका म्हणून तुमकां मत दिलां न्ही? मागीर तुमकां तांच्या मताआड वचपाचो कसलो अधिकार? तुमचीं मतां बदल्लीं म्हणून लोकांचींय मतां बदल्ल्यांत अशें तुमी
गृहीत धरतात?
आनी हे सत्ताधारी, जाणीं आपल्याच उमेदवाराक उडयलो तांच्या गळ्यांत हार घालून तांकां मानान आपणाल्या घरांत घेतात. केदी लजेची गजाल ही! आपणाल्या पडेल उमेदवाराक कितें दिसतलें हाचो विचार तरी करतात काय हे? केपेंच्या आमदाराक पक्षांत घेवपाचो विचार करतना पडिल्ल्या बाबूक कितलें दुख्ख भोगतलें हाचो विचार करतात काय ते? काय बाबूचो पार्सेकार करून पक्षांत आनीक बंड जावपाची तजवीज करतात? हाणीं एक विचार करूंक जाय, केंद्रांत तुमचें सरकार आससर हांगां सगळें चलतलें. पूण फाल्यां जर केंद्रांत बदल जायत तर हांगचें कशें? एका वेळार काँग्रेस हेंच करताली. तांकांय दिसतालें काँग्रेस कायम सत्तेर उरतली पूण आज तांची गत पळेयात. फाल्यां तुमचेंय अशेंच घडचें ना कित्या वेल्यान? सरकार कोणाचेंय येवं पूण ह्या हेवटेन तेवटेन उडयो मारपी दिगुराम-लोबुरामांक बुद्द शिकोवंक जाय. ते सत्ते नेटार जोडिल्ल्या दुडवां खुस्तार परत परत वेंचून येतले. आनी सत्तेक वेंग मारतले. देखून नवो कायदो येवप गरजेचें. पूण हे राजकारणी नवो कायदो येवंक दितले? सत्तेर येवंक तांकां असल्यांची गरज आसताच न्ही!
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
