भांगरभूंय | प्रतिनिधी
दूद 2 जाल्यार बियर 10 रुपयांनी म्हारग
पणजी : अमूल दूद गुजरात वगळून हेर राज्यांनी 2 रुपयांनी म्हारग जातलें, अशें दूद कंपनीच्या अधिकाऱ्यांनी जाहीर केला. जाल्यार गोंयांत बियरी वयलें अबकारी शुल्क वाडयिल्ल्यान आतां बियर 8 ते 10 रुपयांनी म्हारग जातली. नव्या अबकारी शुल्का विशींची अधिसुचोवणी अर्थीक फांट्यान जारी केल्या.
दिवाळी परबे पयलीं अमुलाचें दूद 2 रुपयांनी म्हारग जाल्ल्यान सर्वसामान्यांक फटको बसतलो. महानंद, गोवा डेरी सयत अमुलाच्या दुदाक गोंयांत बरीच मागणी आसा. गुजरात वगळून हेर सगल्या राज्यांनी ही दरवाड जाल्या.
अंदूं अमुलान तिसरे खेपे दरवाड केल्या. मार्चांत अमूल दुदाचे दर वाडिल्लें. उपरांत ऑगस्टांत परतून 2 रुपयांनी वाड जाली. दोन म्हयन्यां भितर परतून दरवाड जाल्या. गोरवां खावडीचे दर वाडिल्ल्यान शेतकाराक चड भाव दिवचो पडटा. हाका लागून दरवाड करपा बगर पर्याय ना, अशें अमूल दूद कंपनीच्या अधिकाऱ्यांनी म्हणलें. हाचे पयलीं गोकुळ तशेंच गोवा डेरीच्या दुदाचे मोल वाडिलां. आतां सगल्या ब्रँडांचें दूद म्हारग जालां.
तशेंच गोंयांत 330 मि.लि. बियर 8 ते 10 रुपयांनी म्हारग जातली. बडवायजर बियरीचो दर 20 ते 25 रुपयांनी वाडटलो. करोना बियरीचो दर 60 ते 65 रुपयांनी वाडटलो. गोंयां परस महाराष्ट्र, कर्नाटक ह्या राज्यांनी बियर तशेंच हेर सोऱ्याचें मोल देंवला. बंगाल, दिल्ली, ओडिसा ह्या राज्यांनी सोऱ्याचें मोल उणें आसा. पयलीं गोंयांत सोरो सवाय आशिल्ल्यान जायते जाण गोंयांतल्यान सोरो व्हरताले. आतां हें प्रमाण देंवतलें. सोरो विक्रेत्यां सयत सरकाराकूय हाचो फटको बसतलो, अशें अ. गों. सोरो विक्रेते संघटणेचे अध्यक्ष दत्तप्रसाद नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
