भांगरभूंय | प्रतिनिधी
खबरां संस्था
हेमिल्टनः न्युझिलंडान पाकिस्तानाक दुसरे टी-20 मॅचींत 21 धांवड्यांनी हारयलें. हेमिल्टनाच्या सेडन पार्क स्टेडियमांत न्युझिलंडान पयलीं खेळून 8 आवट 194 धांवड्यो केल्यो. पाकिस्तानी पंगड 19.3 ओव्हरींत फकत 173 धांवड्यो करपाक शकलो. न्युझिलंडाचो ओपनर फिन एलनात 41 बॉलांत 74 धांवड्यो केल्यो. पाकिस्ताना वतीन बाबर आजम आनी फखर जमानान अर्द शेंकडे केले मात ते पंगडाक जैत मेळोवन दिवपाक शकले ना. ह्या जैतान 5 मॅचींचे हे टी-20 माळेंत न्युझिलंडान 2-0 अशी आघाडी घेतल्या.
पाकिस्तानान टॉस जिखून पयलीं बॉलींग घेतली. न्युझिलंडाचे ओपनर फिन एलन आनी डॅवोन कॉन्वेन आक्रमक सुरवात केली. ताणी 5 ओव्हरींत 59 धांवड्यो केल्यो. 6वे ओव्हरींत कॉन्वेन 20 धांवड्यो करून आवट जालो. केन विलियमसना वांगडा एलनात पंगडाच्यो 100 धांवड्यो पुराय केल्यो. तांणी पन्नास धांवड्याची भागिदारी केली. एलन 74 धांवड्यो करून आवट जालोो. 26 धांवड्याचेर विलमयसन रिटायर्ड हर्ट जालो. ते उपरांत आयिल्लो डेरील मिचेल 17 धांवड्यो करून आवट जालो. कोवीडाची लागण जाल्ल्यान मिचेल सेन्टनर पयलीं मॅच खेळपाक शकलो ना. हे मॅचींत ताणे 13 बॉलांत 25 धावड्यो करून पंगडाक 194 धांवड्यो करून दिल्यो. पाकिस्तानाच्या हॅरीस राऊफान 3 जाल्यार अब्बास आफ्रिदीन 2 विकेटी घेतल्यो.
195 धांवड्याचो फाटलाव करपाक आयिल्ल्या पाकिस्तानाची सुरवात बाबत जाली. दुसरेच ओव्हरीन ओपनर सैम अयुब आनी मोहम्मद रिझवान फकत 7 धांवड्यो करपाक शकले. ह्या उपरांत बाबर आझम आनी फखर जमानान पंगडाचो अर्द शेंकडो पुराय केलो. फखर 50 धांवड्यो करून आवट जालोो. ताणी तिसरे विकेटी खातीर 87 धांवड्यांची भागिदारी केली. 97 उपरांत पाकिस्तानाच्यो फाटोफाट 3 विकेटी पडल्यो. बाबर 66 धांवड्यो करून 17वे ओव्हरींत आवट जालो आनी पाकिस्ताक हार खावची पडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
