भांगरभूंय | प्रतिनिधी
फोंडें: कुळेंच्या दुदसागर घसघशाचेर वचपा खातीर रान खात्यान बंदी घातल्या. तरी लेगीत शुकारा कुळेंकारांनी शुक्रारा दोन थार जिपींचो थरार अणभवलो. सगळे नेम मोडून दुदसागर न्हंय हुपपी दोन थार जिपींचो व्हिडीयो सध्या व्हायरल जाला. त्या जीप चालकां आड कारवाय करची, अशी मागणी लोकांनी केल्या.
मेळिल्ले म्हायती प्रमाण शुक्रारा दनपारां अचकीत दोन नव्यो करकरीत थार जिपी कुळ्यां आयल्यो. दोनूय थार जिपी दुदसागर न्हंये वटेन वळिल्ल्यान सगळ्यांत आदीं थाप जीप कंपनी कडल्यान जायरात करचे खातीर आयिल्ल्याचो थळाव्या लोकांचो समज जालो. फाटल्या कांय दिसां सावन पडपी उटंगाराच्या पावसाक लागून दूदसागर न्हंयेच्या उदकाची पातळी वाडल्या. उदकाची पातळी वाडिल्ली आसतनाय दोनूय थार जिपी न्हंय हुपून पलतडी वचून परत आलतडी आयल्यो. हे संबंदीचो व्हिडीयो सध्या व्हायरल जाला.
रान खात्या वतीन पावसाळ्यांत दुदसागर घसघशाचेर वचपा खातीर जिपी व्हरपाक बंदी आसता. ते संबंदीचो आदेश रान खात्या वतीन फाटल्या जून म्हयन्यांत काडला. रान खात्याच्या आदेशाक थळावे जीप धनी पाळो दितात. पूण शुक्रारा आयिल्ल्यो थार जिपी खंयच्यान आयिल्ल्यो ताची म्हायती अजून मेळूंक ना. न्हंय हुपपा खातीर त्या दोनूय जीप धनयांनी परवानो घेवंक नाशिल्ल्याचें विवीध खात्याच्या अधिकाऱ्यां कडल्यान स्पश्ट जालां. ह्यो जिपी न्हंयेच्या झोता वांगडा व्हांवून गेल्ल्यो जाल्यार व्हड दुर्घटना जातली आशिल्ली. ताका लागून बंदी आसतनाय जबरदस्तीन जिपी न्हंयेंत व्हेल्ले खातीर दोनूय जिपींच्या चालकां आड खर कारवाय करची, अशी मागणी थळाव्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
