भांगरभूंय | प्रतिनिधी
म्हापशें पुलिशेची कारवाय; चोरिल्लो म्हाल जप्त
भांगरभूंय । प्रतिनिधी
म्हापशें: बंदखणींतल्या कैदी इश्टाक मेळपाक म्हूण आयलो आनी चोरी करून गेल्ल्या नांवाडग्या चोराक दुबावीत इन्सार चमनसाब नारंगी (32, रा. घोगळ गृहनिर्माण वसणूक मडगांव, मूळ कर्नाटक) हो म्हापशें पुलिशेचे तावडेंत सांपडलो. पोंबुर्फा तीन दुचाकीच्यो डिकी फोडून तीन मोबायल आनी रोख रक्कम फारायल्ल्या प्रकरणांत पुलिसांनी दुबाविताक अटक केली.
ही चोरयेची घडणूक शेनवारा 4 सप्टेंबराक सांजेच्या 5.15 वरांच्या सुमाराक मदर ऑफ गॉडस् चर्चीच्या आवारांत घडिल्ली. फिर्यादी लिसा डिक्रूज (आराव पोंबुर्फा) हांचे सयत डेंझिला फर्नांडीस आनी हझेल डिसिल्वा हे तिगूय चर्चींत मिसाक आयिल्ले. तांणी आपल्यो दुचाकी पार्किगेचे सुवातेंत हेर वाहनां वागडा दवरिल्ल्यो. त्या तिगांच्योय दुचाकीच्यो डिकी फोडून भितरले तीन मोबायल फोन आनी दोन हजार रुपया मेळून 77 हजारांचो म्हाल चोरयेक गेल्लो. हो चोरयेचो प्रकार सीसीटीव्ही कॅमेऱ्यांत रिकॉर्ड जाल्लो.
6 सप्टेंबराक म्हापशें पुलिशेंत हे विशींची कागाळ दाखल जाताच पुलिसांनी सीसीटीव्ही फुटेजाची पळोवणी केली आनी ते वरवीं दुबाविताची वळख पटयली. ते उपरांत मडगांवां वचून पुलिसांनी दुबाविताक ताब्यांत घेतलो तशेंच घरांतलो चोरयेचो सगळो म्हाल जप्त केलो.
पुलीस निरिक्षक परेश नायक हांच्या मार्गदर्शना खाला हवालदार नंदकिशोर कुडासकार, सुशांत चोपडेंकार, कॉन्स्टेबल राजेश कांदोळकार, प्रकाश पोळेकार, अभिषेक कांसार, आनंद राठोड आनी अक्षय पाटील ह्या पंगडान ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
