भांगरभूंय | प्रतिनिधी
10 येवजण्यां मदीं 3 येवजण्यांचो एकूय पयसो खर्च जावंक ना
पणजी: फाटल्या वर्सा (2024 – 25) दिव्यांगां खातीर आशिल्ल्या गोंय सरकाराच्या 10 येवजण्यां मदीं 50 टक्के परस चड निधी विनावापर उरला. गोंय सरकाराच्या 10 येवजण्यां मदीं तीन येवजण्यांचो एकूय पयसो खर्च जावंक ना. दिव्यांग खात्याचे मंत्री सुभाष फळदेसाय हांणी सभाघरांत सादर केल्ल्या कामगिरी अहवालांतल्यान ही गजाल स्पश्ट जाल्या.
खासगी नोकरी करपी दिव्यांगांक वाहना खातीर पेत्रोल अनुदान दिवपी येवजणेचो सगलो निधी विनावापर आसा. हे येवजणे खातीर पोरूं वर्सा 50 हजार रुपयांची तजवीज आशिल्ली. तातूंतलो एकूय पयसो खर्च जावंक ना.
ज्या दिव्यांगांक कसलेंच काम करप शक्य जायना तांकां 40 हजारांचे अर्थीक सहाय दिवपी येवजण आसा. हे येवजणे खातीर 6.50 लाखाची तजवीज आशिल्ली. हे येवजणेचो निधी विनावापर आसा.
तशेंच कदंब बशींनी दिव्यांगांक फुकट तिकेट सवलत दिवपाची येवजण आसा. हे खातीर 50 लाखांचें अनुदान सरकार म्हामंडळाक दिवपाचें आसलें. ही रक्कम लेगीत खर्च जावंक ना.
हेर आठ येवजण्यां मदीं एक, दोन येवजण्यो सोडल्यो जाल्यार सरासरी 50 ते 55 टक्के निधीचोच वापर जाला.
दिव्यांग विद्यार्थ्यां खातीर विद्यावेतन तशेंच शिश्यवृत्ती दिवपी येवजणे खातीर 35 लाखांची तजवीज आशिल्ली. फाटल्या वर्सा (2024 – 25) वर्सा खातीर 14.93 लाख रुपयांचो वापर जाला. हे येवजणे खाला दिव्यांग विद्यार्थ्यांक म्हयन्याक 200 ते 300 रुपया विद्यावेतन तशेंच 500 ते 900 रुपया मेरेन शिश्यवृत्ती दिवपाची तजवीज आसा. मात वर्सुकी येणावळ देड लाख रुपयां परस चड आसपाक जायना.
सामान्य मनशान दिव्यांग दादलो वा बायले कडेन लग्न केलें जाल्यार 50 हजार रुपयांची अर्थीक मजत दिवपी येवजण आसा. हे येवजणे खातीर तजवीज आशिल्ल्या तीन लाखां पैकीं 1 लाख रुपया खर्च जाला.
बरी कामगिरी करपी दिव्यांग नोकरदार, आस्थापनाचो धनी तशेंच एनजीओक दरेकी 25 हजारांचो पुरस्कार दिवपाची येवजण आसा. 2024 – 25 वर्सा येवजणे खातीर 2 लाखाची तजवीज आशिल्ली. हे पैकीं 1.25 लाख रुपयाचो निधी खर्च जाला.
एनजीओक दिव्यांगा खातीर फिजिओथेरापी केंद्र स्थापन करपाच्या निधीचो मात पुराय वापर जाला. अर्थसंकल्पांत 18.97 लाखाची तजवीज आशिल्ली. हे पैकीं 18.96 लाख रुपया खर्च जाला. ही एकूच येवजण आसा जाचो लागीं लागीं सगलो निधी खर्च जाला.
शारीरिक तशेंच बौद्धीक दिव्यांगां खातीर खासा घरां उबारपा खातीर एनजीओंक अर्थीक मजत दिवपी येवजणे खातीर 7.75 लाख रुपया खर्च जाल्यात. हे येवजणे खातीर 9.15 लाखांची तजवीज आशिल्ली.
ब्रेल लिपीतली पुस्तकां, ऑडियो विज्युअल उपकरणाची वेवस्था आशिल्ल्या ग्रंथालयाक अर्थीक मजत दिवपी येवजणे खातीर 27.4 लाखांची तजवीज आशिल्ली. हे पैकीं 15.98 लाख रुपया खर्च जाला. लागीं लागीं 45 टक्के निधी विनावापर आसा.
एक्सेसीबल इंडिया कॅम्पेन खाला दिव्यांगां खातीर सुविधा उबारप, येरादारीची वेवस्था करपा खातीर 9 कोटी रुपयांची तजवीज आशिल्ली. हे पैकीं फक्त 5.53 लाख रुपया खर्च जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
