भांगरभूंय | प्रतिनिधी
दिवचल, प्रतिनिधी : लाटंबार्से पंचायत वाठारांतल्या खारपाल गांवच्या दोन घरांक आयज फांतोडेर ४.३० वरांचेर उजो लागून सुमार १० लाख रुपयांचें लुकसाण जालें. हे विशीं म्हायती मेळटांच रोखडेच घडणुके सुवातेर येवन दिवचल आनी म्हापशेंच्या उजो पालोवपी जवानांनी हो उजो नियंत्रणांत हाडलो.
हे विशीं चड म्हायती प्रमाण, खारपाल ह्या गांवांत रावपी सोनू गांवस आनी भिवा गांवस हे दोगूय शेजारी. जेन्ना उज्यान पेट घेतलो तेन्ना दोनूय घरांतले लोक सुस्त न्हिदेंत आशिल्ले. फांतोडेर सुमार ४.३० वरांचेर उज्यान पेट घेतलो. रोखडोच उजो शेजारच्या घरांत पावलो. भगभगपी उजो पळोवन घरांतल्यांनी बोवाळ केलो तेन्ना शेजारचे लोकूय जागे जाले. तांणी रोखडीच उजो पालोवपी दळाक म्हायती दिली. उजो पालोवपी दळाचे जवान येता म्हणसर ह्या दोनूय घरांतल्या लोकां भायर काडले. दिवचल उजो पालोवपी दळाचे अधिकारी महादेव गांवस आपल्या पंगडाक घेवन घडणुके सुवातेर पावले. उज्याचो नेट पळोवन तांणी म्हापशें उजो पालोवपी दळाचो बंब मागयलो. उपरांत दोनूय बंबांनी उजो नियंत्रणांत हाडलो.
ह्या उज्यांत दोनूय घरांतले मोलादीक सामान जळून गोबोर जालें. शॉर्टसर्किटाक लागून उजो लागला आसतलो असो दुबाव आसा. फुडलो तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
