​दिल्लींत थारतलो मंत्रीमंडळाचो फॉर्मुला

भांगरभूंय | प्रतिनिधी

मुख्यमंत्र्यां सयत भाजपांत प्रवेश केल्ले आमदार दिल्लींत

प्रधानमंत्री, राष्ट्रीय अध्यक्षांची घेतले भेट

मंत्री, म्हामंडळां विशीं जातलो निर्णय

पणजी : कोणाक मंत्रीपद दिवचें आनी कोणाचें मंत्रीपद काडून मंत्रीमंडळांत समतोल सादचो, ताचो फॉर्मुला आयज (सोमारा) दिल्लींत निश्चीत जातलो. मुख्यमंत्री डॉ. प्रमोद सावंत, भाजप प्रदेश अध्यक्ष सदानंद शेट तानावडे हांची आठ आमदारां सयत दिल्लींत केंद्रीय फुडाऱ्यां कडेन बसका जातली. हे बसके विशीं सगल्यांक उमळशीक आसा.

दिगंबर कामत, मायकल लोबो, डिलायला लोबो, केदार नायक, संकल्प आमोणकार, राजेश फळदेसाय, रुडॉल्फ फर्नांडीस आनी अालेक्स सिक्वेरा ह्या आमदारांनी बुधवारा गट भाजपांत विलीन करीत भाजपांत प्रवेश केलो.आठ आमदारांच्या भाजप प्रवेशाक तांच्या समर्थकांनी येवकार दिल्लो आसलो तरी लोकां मदीं असंतोश आसा. मतदारसंघाचे उदरगती खातीर आमी भाजपांत प्रवेश केलो असो ह्या आमदारांचो दावो आसा. उदरगती खातीर प्रवेश केल्ल्याचो आमदारांचो दावो आसलो तरी अर्थीक वेव्हारा विशीं आरोप प्रत्यारोप सुरू आसा. आठ आमदारां मदल्या तीन आमदारांक मंत्रीपदां मेळटलीं अशी चर्चा आसा. आठ काँग्रेस आमदारांच्या प्रवेशाक लागून मंत्र्यां मदीं हुस्क्याचें वातावरण आसा. आठ जाणां मदल्या कितल्या जाणांक मंत्रीपदां मेळटलीं आनी खंयच्या मंत्र्यांक काडटले? हे विशीं अजून कसलोच निर्णय जावंक ना. हाका लागून सगल्या मंत्र्यां मदीं हुस्क्याचें वातावरण आसा.

आयज रातीं भाजपांत प्रवेश केल्ल्या आमदारां सयत हांव दिल्ली वतलों. वांगडा प्रदेश अध्यक्ष सदानंद शेट तानावडे दिल्ली वतले. प्रधानमंत्री नरेंद्र मोदी, गृह मंत्री अमीत शाह तशेंच राष्ट्रीय अध्यक्ष जे. पी. नड्डा हांची आमी भेट घेतले, अशें मुख्यमंत्री डॉ. प्रमोद सावंत हांणी सांगलें. दिल्ली सावन सगले जाण मंगळारा गोंयांत पावतले. हाका लागून राज्याच्या राजकारणा विशीं दिल्लींत आयज म्हत्वाच्यो घडणुको जातल्यो.

मंत्रीमंडळांत बदल जातलो काय? आठ आमदारां मदल्या कोणाक मंत्रीपद मेळटलें? हे विशीं मुख्यमंत्र्यांनी कसलीच जाप दिवंक ना.

आमदार मायकल लोबो तशेंच दिगंबर कामत हे गोंया भायर आसात. ते आयज भायले भायर दिल्लींत येतले. हेर आमदार मुख्यमंत्री डॉ. प्रमोद सावंत तशेंच प्रदेश अध्यक्षां सयत दिल्लींत वतले.

समतोल सादपाचे यत्न

भाजपा कडेन 20 आमदार आसात. ते भायर मगोचे दोन आनी तीन अपक्षांचो सरकाराक तेंको आसा. सरकारा कडेन भोवमत आसतना लेगीत काँग्रेसींतल्या आठ आमदारांनी भाजपांत प्रवेश केला. हाका लागून भाजपाचें संख्याबळ 28 चेर पावलां. सरकाराक 33 आमदारांचो तेंको आसा. सरकारा कडेन भोवमत आसतना लेगीत आठ आमदारांक कित्याक प्रवेश दिलो? हाचे फाटल्या गणिताचो अदमास राजकी निरिक्षक मांडत आसात.

आयचे बसकेंत आठ आमदारां मदल्या कोणाक मंत्रीपद मेळटलें तशेंच कोणाक कसलें पद मेळटलें, हाची कल्पना केंद्रीय नेतृत्व आमदारांक दितले. तशेंच नवे मंत्री घेतना कोणाक मंत्रीपदा वेल्यान काडटले ताचो निर्णय जातलो. हाचे खातीर मुख्यमंत्री, प्रदेश अध्यक्ष तानावडे आनी राष्ट्रीय अध्यक्षांची बसका जातली.

भाजपांत प्रवेश करचे पयली मायकल लोबो तशेंच दिगंबर कामत हे दिल्लींत वचून आयिल्ले. दोगांचे दिल्ली भेटीक लागून काँग्रेसी मदल्या फुटीची चर्चा सुरू जाली. ह्या वेळार दोनूय आमदारांनी राष्ट्रीय अध्यक्ष जे. पी. नड्डा हांची भेट घेतल्या. हे भेटी उपरांत काँग्रेस आमदारांनी भाजपांत प्रवेश केलाे.

केंद्रीय फुडाऱ्यांचे मान्यताये उपरांत आठ आमदारांनी भाजपांत प्रवेश केलाे. मंत्रीमंडळ बदल तशेंच नव्या मंत्र्यांच्या आस्पावा विशीं केंद्रीय फुडारीच निर्णय घेतले. दिगंबर कामत तशेंच मायकल लोबो हांचें मंत्रीपद निश्चीत आसा. अालेक्स सिक्वेरा हांचें मंत्रीपदा खातीर जाल्यार हेर आमदारांचे म्हामंडळा खातीर यत्न आसात. मंत्रीमंडळा सयत म्हामंडळां मदीं लेगीत बदल निश्चीत आसात.