भांगरभूंय | प्रतिनिधी
गोंय विद्यापीठांत ज्ञानपीठकार दामोदर मावजो हांच्या कथांचेर चर्चासत्र रंगलें
पणजी ः ज्ञानपीठकार दामोदर मावजो हांच्या कथांचो अभ्यास करतना तो शास्त्रीय नदरेन जावचो. कथांचो, कथेंतल्या पात्रांचो वेगवेगळ्या आयामांतल्यान अभ्यास करपाची गरज आसा आनी कोंकणी वाचक मंच सारकिल्ल्या माध्यमांतल्यान तें घडटलें हाची पुराय खात्री आसा अशें दामोदर मावजो हांच्या कथांचेर घडोवन हाडिल्ल्या चर्चासत्राचे अध्यक्ष, सहाय्यक प्रा. नरेश नायक हांणी सांगलें.
गोंय विद्यापीठाच्या शणै गोंयबाब भाशा आनी साहित्य महाशाळेच्या कोंकणी अध्ययन शाखे खाला कोंकणी वाचक मंचान 25 ऑगस्ट 2022 दिसा फॅकल्टी ब्लॉक बी.च्या जुवारी वर्गांत दामोदर मावजो हांच्या कथांचेर चर्चासत्र घडोवन हाडिल्लें.
ह्या चर्चासत्रांत कोंकणी अध्ययन शाखेच्या भाग दोनचे विद्यार्थी आकाश गांवकार आनी गोविंद मोपकार हांणी वांटो घेतलो. आकाश गांवकार हांणी भाई मावजो हांच्या ‘सपन मोगी’ ह्या पुस्तकाचेर जाल्यार गोविंद मोपकार हांणी ‘भुरगीं म्हगेलीं तीं’ ह्या कथा संग्रहाचेर आस्वादनात्मक समिक्षा करून आपलीं मतां मांडलीं.
कोंकणी वाचक मंचाचे वतीन सहाय्यक प्रा. कृपाली नायक हांणी येवकार दिलो. शणै गोंयबाब भाशा आनी साहित्य महाशाळेचे व्हायस डीन डॉ. प्रकाश पर्येंकार हांणी प्रास्तावीक करून ह्या उपक्रमा खातीर परबीं भेटयलीं.
कोंकणींत नवे समिक्षक तयार जावचे, कोंकणींत बरी समिक्षा जावची असो हावेस उक्तावन कोंकणी अध्ययन शाखेचे संचालक डॉ. हनुमंत चोपडेकार हांणी विद्यार्थ्यांक मार्गदर्शन केलें. कार्यावळीक कोंकणी तशेंच हिंदी अध्ययन शाखेचे विद्यार्थ्यीं हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
