दाबोळे अपघातांत एकल्याक मरण

भांगरभूंय | प्रतिनिधी

मुरगांवः दाबोळी मुख्य सिग्नला मुखार एका सिमेंट काँक्रीट ट्रकान सायकलकाराक धपको दिल्ल्यान त्या सायकलकाराक सुवातेचेरूच मरण आयलें. वास्को बायणा सिमेंट काँक्रीट म्हाल दिवन परतून कुठ्ठाळी सांकवाळे वतना हो अपघात जालो.

वास्को पुलिसांनी दिल्ले म्हायती प्रमाण शेनवारा 8 एप्रीलाक सांजेच्या 5.45 वरांचेर दाबोळी राष्ट्रीय म्हामार्गाच्या मुख्य सिग्नला कडेन सिमेंट काँक्रीट ट्रक (जीए 07 एफ 7155) हाचो धेपको बशिल्ल्यान सायकलकार खर्क प्रसाद भरदू जैशी (44, महाराष्ट्र) हाका सुवातेचेरूच मरण आयलें. अपघाताची खबर कळटाच, वास्को पुलीस आनी 108 अ‍ॅम्ब्युलन्स घडणुकेचे सुवातेचेर पावली. अपघाताचो पंचनामो करून कूड मडगांवच्या हॉस्पिसियो हॉस्पिटलांत पोस्टमॉर्टमा खातीर धाडून दिली. सिमेंट काँक्रीट ट्रक चालक अजीत सोनी (24) हाका पुलिसांनी ताब्यांत घेतला. अपघाताचो फुडलो तपास वास्को पुलीस स्टेशनाचे उपनिरिक्षक रोहन नागेशकार करता.