दाबोळी विमानतळ चालूच उरतलो

भांगरभूंय | प्रतिनिधी

दोनूय विमानतळां चालू दवरपाचो निर्णय जून 2010त केंद्रीय मंत्रीमंडळान घेतला

भांगरभूंय I प्रतिनिधी
पणजी : मोपा विमानतळ येरादारीक उक्तो जाले उपरांत दाबोळी विमानतळ चालूच उरतलो. गोंयांतलें दोनूय विमानतळ चालू दवरपाचो निर्णय केंद्रीय मंत्रीमंडळान जून 2010त घेतला. ह्या निर्णयांत आतां बदल जावचो ना, अशें केंद्रीय नागरी हवाई राज्य मंत्री व्ही. के. सिंग हांणी सांगलें.

पणजी एका हॉटेलांत बुधवारा नागरी हवाई येरादारी सेवा संस्थेची आशिया पॅसिफीक परिशद जाली. ह्या परिशदेच्या उक्तावण उपरांत जाल्ले पत्रकार परिशदेंत केंद्रीय मंत्र्यांनी दाबोळी विमानतळा विशींचो दुबाव पयस केलो. हे पत्रकार परिशदेक मुख्यमंत्री डॉ. प्रमोद सावंत, येरादारी मंत्री मॉवीन गुदिन्हो, पर्यटन मंत्री रोहन खंवटे आनी अधिकारी हाजीर आशिल्ले.
दाबोळी विमानतळा विशीं सध्या दुबावाचें वातावरण आसा. मोपा विमानतळाच्या उक्तावणा पयलीच कांय विमान कंपनींनी दाबोळी बदला मोपाचेर विमानां बूक करपाक सुरवात केल्या. हाका लागून दुबाव वाडपाक लागला. दाबोळी विमानतळ हो ‘घोस्ट अॅरपोर्ट’ जावपाची भिरांत विरोधी पक्ष फुडारी युरी आलेमांव हांणी उक्तायल्या. मुख्यमंत्री डॉ. प्रमोद सावंत, येरादारी मंत्री मॉवीन गुदिन्हो हांणी दबोळी विमानतळाची हमी दिले उपरांत केंद्रीय मंत्री व्ही. के. सिंग हांणी लेगीत दाबोळी विमानतळ चालूच उरपाची हमी दिल्या.
अर्थवेवस्थे खातीर दोन
विमानतळांची गरज
पर्यटन हो गोंयचो मुखेल वेवसाय. अर्थवेवस्था पर्यटनाचेर निंबून आसा. विमान येरादारी वाडली जाल्यार पर्यटकांचो आंकडो वाडटलो. हेर वेवसायांक उर्बा मेळटली.
मोपा आनी दाबोळी हे दोनूय विमानतळ दवरपाचो निर्णय जून 2010त केंद्रीय मंत्रीमंडळान घेतला. ह्या निर्णयांत आतां बदल जावप शक्य ना, अशें सिंग हांणी सांगलें.
सध्या दाबोळी विमानतळाचेर देशी आनी विदेशी विमानां येतात. दाबोळीचेर 20 शारांतल्यान विमानां येतात. जाल्यार हेर शारां मोपा विमानतळाक जोडपाची गरज आसा. दाबोळी विमानतळाचेर विमानांची मर्यादा आसा. दाबोळी विमानतळाचेर सध्या जितलीं विमानां येतात, तितलीं विमानां मोपा येरादारीक उक्तो जाले उपरांत लेगीत येतली. दाबोळी विमानतळाचेर कसलोच परिणाम जावचो ना. दाबोळी विमानतळाची सुदारणा जावन विमानां वाडोवपाचे यत्न आसात.
मोपा विमानतळ हो खाजगी विमानतळ आसलो तरी केंद्र सरकाराच्या मान्यताये उपरांत ताची उबारणी जाल्या. हाका लागून मोपा विमानतळाचेर सरकाराचें नियंत्रण आसतलेंच, अशें तांणी सांगलें.

विमानतळ नांवाचो निर्णय केंद्रीय हवाई मंत्रालय घेतलें
मोपा विमानतळाक कितें नांव दिवचें, हे विशींचो निर्णय केंद्रीय नागरी हवाई येरादारी मंत्रालय घेतलें, अशें मुख्यमंत्री डॉ. प्रमोद सावंत हांणी सांगलें. मोपा विमानतळाक सर्गेस्त मनोहर पर्रीकार हांचें नांव ​दिवपाचो प्रस्ताव आसा. तेच प्रमाण गोंयचे पयले मुख्यमंत्री सर्गेस्त दयानंद बांदोडकार हांचेंय नांव दिवचें, अशी मागणी जाता. विमानतळाक कोणाचें नांव दिवचें हाचे वयल्यान वाद सुरू जाला.