भांगरभूंय | प्रतिनिधी
अॅड. उदय भेंब्रेः ‘व्हडलें घर’ कादंबरीचें तीन भाशांनी अणकारीत केल्ल्या पुस्तकांचें लोकार्पण
भांगरभूंय । प्रतिनिधी
मडगांवः भाशेच्या माध्यमांतल्यान आपली संस्कृती सांबाळपाक मेळटा, ह्या उद्देशान भाशेच्या आदारान वेगवेगळ्या राज्यांची निर्मीती जाली. ह्या राज्यांतल्या दरेकल्यान आपले भाशेचो सांबाळ केलो जाल्यार आपसूक आमची संस्कृती तिगतली. हे खातीर दरेके भाशेंतलें साहित्य वेगवेगळ्या भाशांनी अणकारीत जावप गरजेचें आसा, अशें मत ज्येश्ठ साहित्यीक अॅड. उदय भेंब्रे हांणी उक्तायलें.
अॅड. भेंब्रे हांचे ‘व्हडलें घर’ कादंबरीचें इंग्लिशेंत (फेथ इन फायर- विद्या पै), कामडींत (दोड्ड मने- एस. एम. कृष्ण राव) आनी तेलगूंत (यतन गृहम- रंगनाथन राव) अणकार केला. ह्या अणकारीत पुस्तकांचो लोकार्पण सुवाळो मडगांवच्या रवीन्द्र भवनांत जालो. ह्या सुवाळ्या उपरांत ‘क्षेत्रीय भाशेंतल्या अणकार माध्यमांतल्यान संवसाराक एकठांय हाडपाचें तंत्र’ ह्या विशयाचेर परिसंवाद आयोजीत केल्ली. ह्या परिसंवादांत अॅड. भेंब्रे उलयताले.
ह्या परिसंवादांत गीता शेणॉय, जुझे लॉरेन्स, मेल्वीन रॉड्रिग्स, अकल्पिता राऊत देसाय हांणी वांटो घेतलो. अन्वेषा सिंगबाळ हांणी समन्वयक म्हूण जापसालदारकी सांबाळ्ळी.
कोंकणींतलें साहित्य हेर भाशांनी अणकारीत जाता ही खोशयेची गजाल. ताका लागून कोंकणी साहित्य आनी कोंकणी संस्कृती देशांतल्या हेर राज्यांनी पावोवप शक्य आलां, अशें अॅड. भेंब्रें हांणी सांगलें.
कोंकणी साहित्य इंग्लीश आनी हिंदींत अणकारीत जावपाक जाय. पुर्तुगेजांनी आनी गोंयकारांनी लेगीत गोंयची संस्कृती आनी परंपरेचेर आदारीत साहित्य निर्माण केल्लें. तें साहित्य कोंकणींत अणकारीत जावप गरजेचें आसा, अशेंय अॅड. भेंब्रे हांणी सांगलें.
आपलें साहित्य अणकारीत जाले उपरांत आपल्या साहित्याचो दर्जो नेमको कितें आसा, ताची जाणीव जाता. खंयचेय भाशेंतल्या साहित्याचो दुसरे भाशेंत अणकार जावप आयच्या काळांत खूब गरजेचें आसा, अशें मेल्वीन रॉड्रिग्स हांणी सांगलें.
कर्नाटकांतल्या कितल्याशाच लोकांक कोंकणी भाशा आनी संस्कृती विशीं खबरूच नाशिल्लें. कोंकणी साहित्याचो कानडींत अणकार जावपाक लागलो तेन्ना कोंकणी भाशेचो दर्जो आनी म्हत्व तांकां कळपाक लागलें, अशें गीता शेणॉय हांणी सांगलें.
मूळ लेखना परस भाशांतर करप जड कठीण आनी जापसालदारकीचें काम. मोळ लेखकाचो हेतू तश्याक तस्सो दवरून भाशांतर करप एके तरेचें आव्हान आसता. कोंकणी लेखकांची मेजणी राष्ट्रीय साहित्यिकां मदीं जावची, अशी इत्साय शेणॉय हांणी उक्तायली.
जझे लॉरेन्सान सांगलें, बरें भाशांतर खंयचें हाका अणकाराचे खूबशे सिद्धांत आसात. अकल्पिता राऊत देसाय हांणी सांगलें, भाशांतर करतना साहित्यांतलें प्रादेशीक वेगळेंपण सांबाळटना कसरत करची पडटा. खूब खेपे मूळ लेखकाचें मार्गदर्शन लेगीत घेवचें पडटा.
अणकार ही काळाची गरज. खंयचेय भाशेंतल्या साहित्याच्या अणकारांतल्यान संस्कृतीची देवाण- घेवाण जाता, अशें अन्वेषा सिंगबाळ हांणी परिशदेंच्या समारोपा वेळार सांगलें. ही कार्यावळ क्युरेट पब्लिकेशन आनी संजना प्रकाशन हांच्या जोडपालवान आयोजीत केल्लो. क्युरेटाचे मुखेली प्रमोद खेरा हांणी येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
